NFL Halftime Show-ზე გამოსვლამდე ბიონსე ნეტფლიქსის ცნობილი ტექნიკური პრობლემების შესახებ სახალისო ვიდეოს აქვეყნებს. 43 წლის სუპერვარსკვლავმა სოციალურ ქსელში 30-წამიანი თიზერი გააზიარა, რომელიც ამერიკის ეროვნული საფეხბურთო ლიგის თამაშზე მის გამოსვლას აანონსებს. შოუ პირდაპირი ეთერით სწორედ ნეტფლიქსზე გადაიცემა.
ვიდეოში ბიონსე ფეხბურთის მოედანზე ზის და ბანჯოზე Texas Hold ‘Em-ის მელოდიას უკრავს. რამდენიმე წამში კი დაკვრას წყვეტს, სათვალეს იხსნის და როცა კამერა მის სახეს უახლოვდება, ეკრანზე ჩატვირთვის წრე იწყებს ტრიალს, რაც სახალისო გამოხმაურებაა ნეტფლიქსის ტექნიკური პრობლემისა, რომელიც ნოემბერში მაიკ ტაისონისა და ჯეიკ პოლის მატჩის დროს წარმოიშვა.
„გიგზავნით დიდ სიყვარულს ამ შობის დღეს. შევხვდებით ხვალ ჩემს ქალაქში,” – წერს ბიონსე ვიდეოს აღწერაში.
ვიდეო თავად ნეტფლიქსმაც გააზიარა წარწერით: „იტვირთება… ბიონსე. NFL Halftime Show – Ravens vs. Texans, ხვალ ნეტფლიქსზე.”
ეს ბიონსეს პირველი ლაივ შესრულება იქნება Billboard 200-ის ლიდერი Cowboy Carter-ის გამოსვლის შემდეგ. ამერიკის ეროვნულმა საფეხბურთო ლიგამ პოპვარსკვლავის Halftime Show-ზე გამოსვლა ნოემბერში გამოაცხადა. თამაში „რეივენსსა” და „ტექსანს” შორის, ბიონსეს შოუსთან ერთად, პირდაპირი ეთერით ნეტფლიქსზე გადაიცემა.
10 წელზე მეტი გავიდა NFL Halftime Show-ზე ბიონსეს პირველი გამოჩენიდან, როცა 2013 წლის Super Bowl-ის სცენაზე მასთან ერთად Destiny’s Child-იც წარდგა. 2016 წელს კი პოპვარსკვლავი ამავე სცენაზე Coldplay-ს შეუერთდა.
ნახეთ ბიონსეს ვიდეო:
