ამერიკაში მოღვაწე ქართველი მუსიკოსების, Irakli Gabriel-ისა და Anana Kaye-ს ინდი-ალტ დუომ ახალი სიმღერა სახელწოდებით Love is გამოაქვეყნა.
დუეტი ახალი ალბომის Are You There?-ის გამოცემას უახლოეს მომავალში აპირებს, ეს სიმღერა კი სწორედ ამ ალბომის პირველი სინგლია.
ალბომი Are You There? ეთნიკური ინსტრუმენტების გამოყენებით და ხვადასხვა ქვეყნის მუსიკოსების მონაწილეობით ისეთ თემებზე გვიყვება, როგორებიცაა თავისუფლება, ტრაგედია, სიყვარული.
Love is-ის შესრულებაში ასევე მონაწილეობენ: ილია მაზია – დუდუკი, Irakli Gabriel – აკუსტიკური გიტარა, დენიელ სეიმური- ბასი, ჩარლი ჩემბერლენი ელექტრონული გიტარა და მანდოლინა. სიმღერის ავტორები კი არიან – დევიდ ოლნი და კიმ რიჩი.
Anana Kaye
“Love is არის პირველი რელიზი ჩვენი ახალი ალბომიდან Are You There? სიმღერა სიყვარულის უნივერსალურ და პარადოქსულ ბუნებას ეხება („Love is the sickness, Love is the remedy; a glorious triumph, a shameful disaster“). სიყვარულზე სიმღერა ბევრად უფრო ადვილია, ვიდრე საუბარი. სიმღერაში სიყვარული აღწერილია, როგორც არამხოლოდ გრძნობა და ემოცია, არამედ, როგორც ყოფიერების განუყოფელი ნაწილი. მუსიკალური კლიპი გადავიღეთ მუშთაიდის ბაღში, სადაც მე და ჩემი და ბავშვობაში ხშირად დავდიოდით ხოლმე. ჩემთვის ეს ადგილი ჯადოსნური, დროში გაჩერებული პორტალია, რომელიც ახლაც ისევე გამოიყურება, როგორც ჩემს მოგონებებში. ამ პარკის შექმნის ლეგენდაც ძალიან მიყვარს. მუჯთაჰიდს თავისი ცოლისთვის, ნინოსთვის მიუძღვნია ეს ადგილი. როცა გარდაიცვალა, მან სახლის წინ დაკრძალა მეუღლე და საფლავზე მრავალი წითელი ვარდი დარგო. მუშთაიდი ფიროსმანის საყვარელი ბაღიც ყოფილა. ზუსტად აქ შეუყვარდა ნიკოს ერთი დანახვით ფრანგი მარგარიტა, ვინც იმავე სცენაზე მღეროდა, რომელიც ასახულია ჩვენი ვიდეოკლიპის ბოლოში. ლეგენდებს და ისტორიებს თავი რომ დავანებოთ, ამ ადგილას სიყვარული ფიზიკურად ჰაერში ტრიალებს. ეს აისახება იმ საყვარელ ხალხზე, რომელიც იქ მუშაობს. დიდი მადლობა მინდა გადავუხადო შოთა პაპას, რომელიც საბავშვო მატარებელს მართავს და რომელიც ძალიან დაგვეხმარა, რომ სასურველი კადრები გადაგვეღო. ასევე, დიდი მადლობა “ეშმაკის ბორბლის” ოპერატორს. უპრობლემოდ გვირთავდა ატრაქციონს მანამდე, სანამ მზის ჩასვლის იდეალური კადრი არ დავიჭირეთ ყველაზე მაღალი წერტილიდან.
სიმღერის მუსიკალური პროდიუსერია ჩარლი ჩემბერლენი, რომელიც დაგვეხმარა, რომ ჩვენი თბილისური ფესვების და ამერიკული აპალაჩური ფოლკლორის სინთეზი გაგვეკეთებინა. სიმღერა ჩაწერილია ნაშვილში Forty-one Fifteen სტუდიაში.
მოისმინეთ Anana Kaye-ს სიმღერა Love is:
