თუ გინახავთ ფილმი A Complete Unknown, ან ყოფილხართ ბობ დილანის კონცერტზე, ან თუნდაც მისი სოციალური მედიის ანგარიშებისთვის მიგიდევნებიათ თვალი, მაშინ გეცოდინებათ, რომ როკ-ენ-როლის ვარსკვლავის ონლაინ პარამეტრები რთულად გამოსაცნობია. ეს კი, თავის მხრივ, ხსნის დილანის ბოლო ამოუხსნელ ინსტაგრამ აქტივობას – საკუთარ გვერდზე Machine Gun Kelly-ს 2016 წლის გამოსვლის სრულიად უკონტექსტო გაზიარებას. რატომ MGK? რატომ ეს ვიდეო? ამას ვერასდროს გავიგებთ, თუმცა კელიც და მისი პროდიუსერიც ამ ფაქტით აღტაცებული დარჩნენ.
„ძალიან მაგარია, ტელეფონი რომ გაქვს,” – დაწერა კელიმ კომენტარებში. მისმა პროდიუსერმა Mod Sun-მა კი დაამატა: „ეს ჩემი საყვარელი ამბავია, რაც კი ინტერნეტში მომხდარა.” სხვა კომენტარებში ვკითხულობთ: „ბობს, სავარაუდოდ, ეგონა, რომ ეს ტიმოთი შალამე იყო და ამიტომ გააზიარა”; „მგონი MGK-მ ემინემს მოუგო. ის ყველა დროის ყველაზე დიდმა პოეტმა გააზიარა”; „ბობ, დიდი პატივისცემით, ეს რა ჯანდაბაა” და სხვა.
MGK-ს ვიდეო ერთ-ერთია დილანის უცნაური ონლაინ აქტივობებიდან. წლის დასაწყისში, სულ რამდენიმე დღით ადრე აშშ-ში აპლიკაციის მოსალოდნელ აკრძალვამდე, 83 წლის ლეგენდა „ტიკტოკს” შეუერთდა და თავისი კარიერის რეტროსპექტიული ვიდეო ატვირთა. ხოლო თუ დილანის ინსტაგრამს ჩამოსქროლავთ, ბოლო ორი თვის განმავლობაში წააწყდებით პოსტებს მისი Rough and Rowdy Ways ტურნეს შესახებ; Les Paul-ის საარქივო ვიდეოს, რომელიც წარადგენს Van Halen-ის გიტარისტ ედი ვან ჰალენს; ასევე რიკი ნელსონის ერთ-ერთ გამოსვლას; 1952 წლის ფილმ Clash By Night-ის მონაკვეთს, რომელშიც ბარბარა სტენვიკი და მერლინ მონრო თამაშობენ; საყვარელი გიტარისტის, ჯანგო რეინჰარდტის ლაივშესრულებას და კიდევ, ფრენკ ჯეიმსის „ანდერძის” კითხვას.
რას ნიშნავს ეს ყველაფერი, არავინ იცის. თუმცა ისევ დილანის უკვდავი სიტყვები რომ მოვიშველიოთ, „არ განსაჯოთ ის, რაც არ გესმით.”
