Bridge To Funds ახალი, ინოვაციური პლატფორმაა, რომელიც კრეატიული ინდუსტრიების მხარდასაჭერად და მათი შემოქმედებითი იდეების განსავითარებლად შეიქმნა. პლატფორმის სამიზნე აუდიტორიებია: მუსიკოსები, ფესტივალების ორგანიზატორები, ვიდეოკონტენტის შემქმნელები, არტისტები, კულტურული და IT სტარტაპები. Bridge To Funds ხელოვნური ინტელექტისა და ბლოკჩეინ ტექნოლოგიას აერთიანებს, რომელთა საშუალებითაც ის ნებისმიერ შემოქმედს იდეის პროფესიონალურ ბიზნესგეგმად გარდაქმნასა და სწორი ინვესტორის პოვნაში ეხმარება. პლატფორმის შექმნელები არიან: სერგი გვარჯალაძე, გიორგი თაბუკაშვილი, ლუკა ლორთქიფანიძე, თინათინ ჭუმბურიძე, თემურ ჯაფარიძე და ზაზა ჯაფარიძე.
სერგი გვარჯალაძე:
„დღეს შემოქმედებითი ინდუსტრიები მსოფლიო მასშტაბით 2.7 ტრილიონი დოლარის ეკონომიკას ქმნის. პროგნოზის მიხედვით კი, 2032 წლისთვის ეს რიცხვი 4 ტრილიონს გადააჭარბებს. თუმცა ინოვაციურ იდეებს ხშირად აკლდება ბიზნესმხარე და დაფინანსებაზე წვდომა. აი, სწორედ ამ პრობლემებს გადაწყვეტს Bridge To Funds – მარტივი, ხელმისაწვდომი და პროფესიონალური გზებით. მაგალითად, პლატფორმის დახმარებით, არტისტს შეეძლება განავითაროს ბიზნესგეგმა, ვთქვათ, ახალი ლეიბლისთვის ან მუსიკალური ფესტივალისთვის; დეველოპერს შეუძლია განავითაროს ახალი კომპიუტერული თამაში და ა.შ.
პლატფორმა აშშ-ისა და დიდი ბრიტანეთის ბაზრებზეა გათვლილი. რა თქმა უნდა, ის საქართველოშიც იმუშავებს, თუმცა ძირითადი სამიზნე ეს ორი დიდი ქვეყანა იქნება. Bridge To Funds უკვე შეფასდა 1 მილიონ დოლარად და ახლა ინვესტორების წინაშე წარსადგენად მზადდება.
კრეატიული ინდუსტრიების გარდა, Bridge To Funds-ის გამოყენება თავად ინვესტორებსაც შეეძლებათ, რომლებიც ახალ, საინტერესო შემოქმედებით პროექტებს ეძებენ. პლატფორმა იძლევა იმის საშუალებასაც, რომ სპონსორებმა თუ საერთაშორისო საგრანტო ორგანიზაციებმა ის თავიანთი განაცხადის კოორდინირებისთვის მოირგონ.”
პლატფორმის პირველადი ვერსია უკვე ტესტირებულია ბეტა მომხმარებლებთან, რომელთა შორის არიან არტისტები, მენეჯერები და კულტურის სტარტაპები. უახლოეს კვირებში კი შემოქმედებითი ინდუსტრიების ასევე ლიმიტირებული რაოდენობის წარმომადგენლებს პროგრამის ახალი ვერსიის დატესტვაც შეეძლებათ, რაც მათ საშუალებას მისცემს, უსასყიდლოდ გამოცადონ Bridge To Funds-ის სრული სერვისი.
