ნინი ნუცუბიძემ და Nikakoi-მ (ნიკა მაჩაიძე) ახალი ერთობლივი ტრეკი, სახელწოდებით Scifi Tragedy გამოუშვეს. ნამუშევარი მუსიკალურ სტრიმინგ პლატფორმებზე 12 მაისს გამოქვეყნდა. Scifi Tragedy ნინი ნუცუბიძის და Nikakoi-ს პირველი კოლაბორაციული ნამუშევარია. ტრეკის პროდიუსერი და კომპოზიტორი ნიკა მაჩაიძეა, ხოლო ტექსტი ნინი ნუცუბიძეს ეკუთვნის. ნამუშევარში ასევე გამოყენებულია გოგი ცაბაძის კომპოზიცია „მე ხომ შენი ლანდი ვარ”.
სიმღერის მიქსინგზე და მასტერინგზე ნიკალა ზუბიაშვილმა იმუშავა. ჩანაწერის ციფრულ დისტრიბუციას ქართული არტისტ მენეჯმენტის კომპანია Bloom Music უზრუნველყოფს. სინგლის ე.წ. არტვორქი ლიზა ყაჯრიშვილს ეკუთვნის. Scifi Tragedy-ს გავრცელების მედია პარტნიორია Billboard Georgia.
ნინი ნუცუბიძე მუსიკოსი, სიმღერების ავტორი და პროდიუსერია, რომლის შემოქმედებაც აერთიანებს ისეთ ჟანრებს, როგორიცაა სოული, R&B, ჰიპ-ჰოპი, ექსპერიმენტული მუსიკა და Glitch. 2024 წელს ნინი ნუცუბიძე გახდა Billboard Women in Music-ის ნომინანტი კატეგორიაში Global Force. იმავე წელს, მან მონაწილეობა მიიღო გერმანიის ერთ-ერთ უდიდეს კლასიკურ ფესტივალში – Beethovenfest, სადაც ქართველ პიანისტ გიორგი გიგაშვილთან ერთად წარდგა. 2024 წელს არტისტმა გამოუშვა EP სახელწოდებით Paper Planes.
Nikakoi ქართველი მუსიკალური პროდიუსერი, კომპოზიტორი და რეჟისორია. ნიკა მაჩაიძე ქართული ელექტრონული მუსიკის პიონერად ითვლება. მან შემოქმედებითი კარიერა 1990-იანი წლების შუა პერიოდში დაიწყო. არტისტმა თავისი ექსპერიმენტული მუსიკალური პროექტები არაერთ ქვეყანაში წარადგინა.
