1991 წლის დოკუმენტურ ფილმში Truth or Dare, მადონამ განაცხადა, რომ შონ პენი მისი ცხოვრების სიყვარული იყო. ახლა, სამი ათწლეულის შემდეგ, მსახიობი ამ თემაზე საკუთარ აზრს გამოთქვამს.
The Louis Theroux Podcast-ის ახალ ეპიზოდში პენმა თქვა, რომ მისი ყოფილი ცოლი დოკუმენტურ ფილმში ამ თემაზე საუბრისას „ძალიან საყვარელი” იყო. როდესაც პენს ჰკითხეს, ახსოვდა თუ არა მადონას სიტყვები, მან უპასუხა: „მახსოვს. მრავალი წელია, რაც ის ჩემთვის კარგი მეგობარია”.
ოსკაროსანმა მსახიობმა მადონასთან ოთხწლიან ქორწინებაზეც ისაუბრა. 1986 წელს წყვილმა ფილმში Shanghai Surprise ერთად მიიღო მონაწილეობა. 1989 წელს მადონა და შონ პენი განქორწინდნენ, თუმცა მეგობრობა შეინარჩუნეს.
„მალე მივხვდით, რომ კარგი პირველი პაემანი ქორწინების საფუძვლად შეცდომით ვაქციეთ. განქორწინების შემდეგ არ გაგვჭირვებია, რომ მეგობრული ურთიერთობა დაგვებრუნებინა. მასთან ბევრი თბილი მოგონება მაკავშირებს,” – აღნიშნა შონ პენმა. მსახიობმა ასევე თქვა, რომ ქორწინების დროს ბევრ ალკოჰოლს იღებდა და ამის გამო მადონასგან საყვედური დამსახურებული და სამართლიანი იყო.
მადონამ შონ პენთან განშორების შემდეგ, 2000 წელს რეჟისორ გაი რიჩიზე იქორწინა, თუმცა წყვილი 2008 წელს დაშორდა. პენი 1996-2010 წლებში მსახიობ რობინ რაიტზე იყო დაქორწინებული, ხოლო 2020-2022 წლებში – ლეილა ჯორჯზე.
პენის კომენტარის საჯაროდ გავრცელებამდე ცნობილი გახდა, რომ მადონას ბიოგრაფიულ სერიალზე მუშაობა დაწყებულია. გამოცემა Deadline-ის ცნობით, ვარსკვლავი შონ ლევისთან ერთად Netflix-ის მინი სერიალზე მუშაობს, რომელიც მის ცხოვრებასა და კარიერას მიეძღვნება.
მადონა ამავდროულად მუსიკაზეც არის ფოკუსირებული. ის თანამშრომლობს პროდიუსერ სტიუარტ პრაისთან, რომელმაც მადონას 2005 წლის ჰიტად ქცეული ალბომი – Confessions on a Dance Floor შექმნა. უკვე ექვსი წელია, რაც მადონას ახალი ალბომი არ გამოუშვია. მისი ბოლო სტუდიური ნამუშევარი Madame X 2019 წელს გამოვიდა.
