რთულია, წარმოიდგინო ვინმე, ვინც Charli xcx-ის Brat-ის წარმატების გამეორებას შეძლებს. თუმცა ახალ ინტერვიუში ბრიტანელმა პოპვარსკვლავმა აღნიშნა, რომ ამ საკითხზე თავად სულაც არ ღელავს.
კანის კინოფესტივალზე ჩარლიმ იმ წნეხზე ისაუბრა, რომელიც შესაძლოა მას Brat-ის გამოცემის შემდეგ ჰქონდეს. „რეალურად, არავითარ წნეხს არ ვგრძნობ, რომ ისეთი ალბომი უნდა გამოვცე, როგორიც Brat-ია, რადგან როცა მას ვაკეთებდი – მიუხედავად იმისა, რომ მჯეროდა მისი და ზუსტად ვიცოდი, რა მინდოდა – მაინც წარმოდგენა არ მქონდა, თუ როგორ მიიღებდა მას მსმენელი,” – ამბობს მომღერალი.
„მე ის საკუთარი თავისთვის გავაკეთე და ისე დავარეკლამე, როგორც მე თვითონ მინდოდა. თუმცა წარმოდგენა არ მქონდა, რომ ადამიანები მასთან ისეთ კავშირს დაამყარებდნენ, როგორც ეს მოხდა. ასე რომ, ჰო, მე არ ვგრძნობ წნეხს, რადგან ვფიქრობ, რომ არასდროსაა შესაძლებელი ერთი და იმავე რაღაცის ორჯერ გაკეთება. შესაბამისად, ჩემი შემდეგი ალბომი, სავარაუდოდ, კრახი იქნება, რაზეც, გულწრფელად რომ ვთქვა, პრობლემა არ მაქვს.”
2024 წელს გამოცემული Brat მესამე ადგილზე გავიდა Billboard 200-ში, რაც დღემდე ჩარლის ყველაზე მაღალი მაჩვენებელია. მისი ლაიმისფერი მწვანე ყდით დაწყებული, 2024 წლის აშშ-ის საპრეზიდენტო კამპანიის ცენტრში ყოფნით დასრულებული, ალბომმა მომღერალი ვიწრო წრეების საყვარელი არტისტიდან ა-კლასის პოპვარსკვლავად აქცია.
ამ ეტაპზე Charli xcx ალბომის ტურნეში იმყოფება.
