როდ სტიუარტმა 2025 წლის AMA დახურა. მუსიკოსმა Lifetime Achievement Award მიიღო და შოუს დასასრულს აუდიტორიას ენერგიული გამოსვლა შესთავაზა.
80 წლის ლეგენდა სცენაზე მისი რვა შვილიდან ხუთმა წარადგინა. ესენი იყვნენ კიმი, რაბი, რენე, ლაიამი და შონი, რომელთაც პატივი მიაგეს მამის 60-წლიან კარიერას.
„სრულიად სახტად დავრჩი. წარმოდგენაც არ მქონდა, რომ ისინი აქ იყვნენ,” – თქვა მუსიკოსმა მას შემდეგ, რაც შვილებს ჩაეხუტა. შემდეგ კი იხუმრა: „სულ რვა მყავს… სახლში ტელევიზორი არ მქონდა.”
სცენაზე სტიუარტმა ადრეული 1960-იანი წლები გაიხსენა – პერიოდი, როცა სიმღერა დაიწყო და როცა, მისივე თქმით, დარბაზში მსხდომთა დიდი ნაწილი დაბადებულიც არ იყო. „შეუპოვარი სურვილი მქონდა, რომ მემღერა. მხოლოდ ეს იყო, რისი კეთებაც მსურდა. სიმდიდრე და ცნობადობა არ მაინტერესებდა.”
სტიუარტისთვის განსაკუთრებით ემოციური აღმოჩნდა ის ფაქტი, რომ მასთან ერთად სცენაზე მისი ხუთი შვილი იდგა. მან კიდევ ერთხელ აღნიშნა ეს სასიამოვნო სიურპრიზი, რის შემდეგაც 1988 წლის ჰიტი Forever Young შეასრულა. შავ შარვალში, თეთრ პიჯაკსა და შეხსნილ პერანგში გამოწყობილმა ლეგენდამ, რომელსაც ასაკი სრულებით არ ეტყობოდა, დაჯილდოების ცერემონია თავისი ენერგიული შესრულებით დახურა.
ნახეთ როდ სტიუარტის სამადლობელი სიტყვა:
ამერიკის მუსიკალური დაჯილდოების ორგანიზატორია Dick Clark Productions, რომელიც ბილბორდის მშობელი კომპანიის, Penske Media-ს მფლობელობაშია.
