ცნობილმა K-POP ჯგუფმა, სახელწოდებით ITZY ახალი მუსიკალური ვიდეო – Girls Will Be Girls გამოუშვა. კლიპი საქართველოშია გადაღებული და სხვადასხვა ეპიზოდში თავად ჯგუფის წევრები მონაწილეობენ. ვიდეოს სიუჟეტი მებრძოლ ახალგაზრდა ქალებზეა. სცენებში ITZY-ს წევრ ვარსკვლავებს ვხედავთ ისეთი ლოკაციების ფონზე, როგორებიც არის თბილისის არქეოლოგიის მუზეუმი, მე-9 ბლოკი და სხვა.
ნამუშევარზე საავტორო უფლებები სამხრეთ კორეულ მუსიკალურ ლეიბლ JYP Entertainment-ს ეკუთვნის. სწორედ ამ კომპანიამ ჩამოაყალიბა ITZY.
სამხრეთკორეულ ჯგუფს ხუთი წევრი ჰყავს: Yeji, Lia, Ryujin, Chaeryeong და Yuna. მათი დებიუტი 2019 წლის 12 თებერვალს შედგა ალბომით It’z Different და მისი წამყვანი სიმღერით Dalla Dalla, რომელმაც დიდ კომერციულ წარმატებას მიაღწია. სიმღერა მეორე ადგილზე მოხვდა ასევე Billboard K-pop Hot 100-ის ჩარტში. ITZY-მ ერთგვარი რეკორდი დაამყარა, რამდენადაც K-pop ჯგუფების სადებიუტო ვიდეოებს შორის 24 საათში ყველაზე მეტი ნახვა სწორედ Dalla Dalla-ს კლიპს ჰქონდა. 2019 წელს Dalla Dalla გოგონათა ჯგუფის ყველაზე წარმატებულ სიმღერად იქცა სამხრეთ კორეაში.
ITZY გახდა პირველი K-pop გოგონათა ჯგუფი ისტორიაში, რომელმაც მოიპოვა ე.წ. Rookie Grand Slam, ანუ წლის დებიუტანტისთვის განკუთვნილი ყველა მთავარი ჯილდო შემდეგ დაჯილდოებებზე: Golden Disc Awards, Gaon Chart Music Awards, 2019 წლის Melon Music Awards, 2019 წლის Mnet Asian Music Awards და Seoul Music Awards.
ნახეთ ვიდეო:
