თბილისში, რუსთაველის 31 ნომერში, სასტუმრო „ტელეგრაფი” გაიხსნა. სასტუმრო ყოფილი ცენტრალური ფოსტის ისტორიულ შენობაშია განთავსებული, რომელიც საბჭოთა არქიტექტურის დღემდე შემორჩენილი ერთ-ერთი მნიშვნელოვანი ნიმუშია. მის რესტავრაციაზე დიზაინერულმა კომპანია Neri & Hu-მ იზრუნა.
სასტუმრო პრეზენტაციით გაიხსნა, სადაც სტუმრებმა „ტელეგრაფისა” და მისი შექმნის პროცესის შესახებ მომზადებული ვიდეო იხილეს. აუდიტორიას მიმართა Silk Road Group-ის დამფუძნებელმა გიორგი რამიშვილმაც. გახსნის მეორე ნაწილში კი სტუმრების წინაშე ცნობილი დიჯეი და მულტიინტრუმენტალისტი კაიდი ტეითემი წარდგა.
სასტუმრო „ტელეგრაფი” აერთიანებს 239 ნომერს, 7 რესტორანს, ბიბლიოთეკას, ჯაზკლუბსა და სხვა მნიშვნელოვან სივრცეებს. აღსანიშნავია „ტელეგრაფისა” და Rolling Stone-ის თანამშრომლობა, რომლის ფარგლებშიც სასტუმროს ბოლო სართულზე Rolling Stone-ის ბარი განთავსდება. 50-წლიანი ისტორიით Rolling Stone ერთ-ერთი ყველაზე სანდო და გავლენიანი მუსიკალური მედიაა მსოფლიოს მასშტაბით. „ტელეგრაფის” სტუმრებს კი ექსკლუზიური წვდომა ექნებათ მათ გასართობ და საინფორმაციო კონტენტზე.
გიორგი რამიშვილი:
„ჩვენ ვიყიდეთ Rolling Stone-ის ლიცენზია, რომელსაც 60 მილიონი მკითხველი ჰყავს მთელ მსოფლიოში. ეს მათი პირველი ამ ტიპის ბარი იქნება და ყველაფერი, რაც აქ გაიმართება, მათ გამოცემაში დაიბეჭდება, რაც კიდევ უფრო გაზრდის ამ ბარის, „ტელეგრაფისა” და თბილისის ცნობადობას საერთაშორისო მასშტაბით.”
სასტუმროში განთავსებულია თამაზ ყურაშვილის (თათუზა) სახელობის ჯაზკლუბიც, ასევე Billboard საქართველოს სივრცე, რომელიც გამოცემის პოდკასტებს უმასპინძლებს.
„ტელეგრაფი” რეგიონში პირველი სასტუმროა, რომელიც მსოფლიოს წამყვანი სასტუმროების ქსელის, World Leading Hotels-ის წევრია.
„ეს პროექტი განსაკუთრებულია, რადგან ის მდებარეობს რუსთაველზე და ეს არის ქალაქის გული. ასევე არის რესპუბლიკის მოედნის განვითარების უმნიშვნელოვანესი ნაწილი სასტუმრო „ივერიას” შემდეგ. ეს არის უნიკალური პროექტი, როგორც ექსტერიერით, ასევე ინტერიერით, რომელიც ლადო ალექსი-მესხიშვილსა და მის გუნდს ეკუთვნის. მას მართავს Silk Hospitality, თუმცა ამავდროულად არის World Leading Hotels-ის გაერთიანების წევრი, რაც მას საერთაშორისო მნიშვნელობას სძენს,” – აღნიშნავს გიორგი რამიშვილი.
