Public Enemy-მ ახალი საპროტესტო სიმღერა გამოსცა. March Madness 19 ივნისს ამერიკის თავისუფლების დღის (Juneteenth) პატივსაცემად გამოვიდა.
„Public Enemy ისევ ებრძვის ძალაუფლებას,” – წერს Flavor Flav პლატფორმა X-ზე. მუსიკოსი იხსენებს, თუ როგორ მოაწერა 2021 წელს ჯო ბაიდენმა ხელი 19 ივნისის ეროვნული დღესასწაულად გამოცხადებას და რომ 160 წელი გავიდა, რაც 1865 წელს კონფედერაცია სამოქალაქო ომში დანებდა. შემდეგ კი აღნიშნავს: „მაგრამ დღესაც რაღაც მსგავსის წინაშე ვდგავართ განუწყვეტელი ძალისხმევებით, რომ ჩამოშალონ მრავალფეროვნება, თანასწორობა და ინკლუზიურობა. ჩვენ არ გვინდა ის, რაც ისრაელსა და პალესტინას შორის ხდება, ახლა კიდევ – ირანი. არ გვინდა, რაც უკრაინასა და რუსეთს შორის ხდება. მძულს ომი. მძულს, რაც მსოფლიოს გარშემო და აშშ-ში ხდება. ჩვენ შეერთებული შტატები უნდა ვიყოთ, ომი კი არ არის ერთიანობა. ჩვენ გვაქვს ჩვენი უფლებები და შეგვიძლია მათი გამოყენება, სანამ ისინი კიდევ გვეკუთვნის. მე ეს პლატფორმა მაქვს და სანამ მექნება, მას გამოვიყენებ.”
მუსიკოსმა გააზიარა სიმღერაც, რომელშიც სამი უნივერსიტეტის სტუდენტებიც მონაწილეობენ. „პატივი იყო, მემუშავა ჰარვარდის, ბერკლისა და ჰოვარდის უნივერსიტეტების სტუდენტებთან, რათა შეგვექმნა საპროტესტო ჰიმნი იმ მნიშვნელოვან საკითხებზე, რომელთა პირისპირაც ახლა ვართ, როგორც ადამიანები.”
PUBLIC ENEMY IS STILL FIGHTING THE POWER ✊🏾
— FLAVOR FLAV (@FlavorFlav) June 19, 2025
Today is Juneteenth.
It became a federally recognized holiday on June 19, 2021 signed into law by The President. This was only 4 years ago and 160 years since the confederation surrendered during the civil war. But it feels like we… pic.twitter.com/N9AysjcI2S
სიმღერა იწყება 911-ის ზარის ჩანაწერით, სადაც ოპერატორი ზარის ავტორს ეკითხება, კიდევ ესმის თუ არა გასროლის ხმები. ჟურნალისტი კი ეთერში აცხადებს: „თქვენ ისმენთ მასწავლებლის ხმას, რომელიც შველას ითხოვს და ამავდროულად სტუდენტების დამშვიდებას ცდილობს.”
განცხადება გაავრცელა ასევე Chuck D-მ, რომელიც სწორედ იარაღით ჩადენილ ტერორისტულ აქტებს ეხება: „იარაღით ძალადობა არ არის ნორმალური, მაგრამ იმდენი ხანია გრძელდება, რომ უკვე ნორმალიზდა. ჩვენ მას უნდა მოვეპყროთ, როგორც ავადმყოფობასა და ეპიდემიას, რაც რეალურად არის.”
გრემის ნომინანტი ჯგუფი ამჟამად მსოფლიო ტურნეში იმყოფება, რომელიც ივნისში იტალიაში დაიწყო. Public Enemy ასევე წარდგება Guns n’ Roses-ის ევროპული ტურნეს რამდენიმე კონცერტზე.
მოუსმინეთ March Madness-ს:
