ხანგრძლივი პაუზის შემდეგ Lorde-მ მსმენელს ახალი სტუდიური ალბომი წარუდგინა. 27 ივნისს მან ოფიციალურად გაავრცელა თავისი მეოთხე ალბომი, სახელად Virgin, რომელშიც 11 ახალი სიმღერაა შესული. ალბომის ტრეკლისტში ვხვდებით სინგლებს: What Was That, Man of the Year და Hammer, რომელიც მუსიკოსმა ალბომის გამოცემამდე გამოუშვა.
ალბომის ანონსისას, რომელიც აპრილში გავრცელდა, Lorde-მ Virgin “გამჭვირვალე” ფერს შეადარა. მისი თქმით, ეს ნამუშევარი ჰგავს ყველაფერს, რაც გამჭვირვალეა: „როგორიცაა აბაზანის წყალი, ფანჯარა, ყინული” და ასე შემდეგ. „ვცდილობდი, ჩემი თავი დამენახა – სრულად, ბოლომდე. მინდოდა, შემექმნა მასალა, რომელიც ასახავდა ჩემს ქალურობას: ნამდვილს, ინსტინქტურს, გულუბრყვილოს, ელეგანტურს, გახსნილს, სულიერს და ცოტა მასკულინურს,” – განმარტა მუსიკოსმა.
მიუხედავად იმისა, რომ მომღერალმა ალბომში ერთნაირ ჟღერადობაზე გააკეთა აქცენტი, Virgin-ის ერთ-ერთი ყველაზე დიდი სიახლე პროდიუსერები არიან. ამ პროექტზე Lorde-მ ახალ კოლაბორატორებთან იმუშავა, მათ შორის არიან Jim-E Stack, დენ ნირო და Dev Hynes. Lorde-მ წინა ალბომების – Melodrama-ს და Solar Power-ის ფარგლებში ჯეკ ანტონოვთან იმუშავა, ამჯერად კი ანტონოვს არტისტთან არ უთანამშრომლია. მიუხედავად იმისა, რომ მომღერალმა ჯეკ ანტონოვს სანდო პარტნიორი უწოდა, აღნიშნა, რომ ამჯერად ინტუიციას უნდა ენდოს და თავისი გზა განაგრძოს.
Virgin-ის გამოშვებამდე Lorde აქტიურად საუბრობდა იმაზე, თუ როგორ აისახა ალბომში სქესისა და იდენტობისადმი ახალი დამოკიდებულება. როგორც ამბობს, პოპმომღერალ Chappell Roan-თან საუბარმა უბიძგა, სიღრმისეულად გაეანალიზებინა საკუთარი იდენტობა. ”ვთქვი, მე ქალი ვარ… გარდა იმ დღეებისა, როცა კაცი ვარ,” – იხსენებს ის. „ვიცი, ეს არ არის დამაკმაყოფილებელი პასუხი, მაგრამ ჩემი რაღაც ნაწილი ჩარჩოებში მოქცევას მთელი ძალით ეწინააღმდეგება.“
მოუსმინე Lorde-ს ახალ ალბომს – Virgin.
