გერმანიის პროკურატურამ სირიული წარმოშობის მოზარდს ბრალი წაუყენა ტერორისტული თავდასხმის დაგეგმვაში მონაწილეობისათვის. საქმე ეხება შარშან ვენაში დაგეგმილ თავდასხმას, რომელიც ტეილორ სვიფტის Eras Tour-ის ფარგლებში გამართულ კონცერტზე უნდა განხორციელებულიყო, თუმცა სამართალდამცავებმა დროული რეაგირებით თავდასხმის აღკვეთა შეძლეს.
გერმანიის პროკურატურამ 27 ივნისს გაავრცელა ინფორმაცია, რომ არასრულწლოვანს ოფიციალურად წარდგენილი აქვს ბრალი უცხოური ტერორისტული ორგანიზაციის მხარდაჭერისა და სახელმწიფოს წინააღმდეგ ძალადობრივი ქმედების ჩადენის მცდელობისთვის. არასრულწლოვნობის გამო მისი სრული სახელი არ სახელდება – პროკურატურა მას მოიხენიებს მხოლოდ ინიციალებით, როგორც „მოჰამედ ა.“-ს.
სამართალდამცავების ინფორმაციით, მოჰამედ ა. სირიის მოქალაქეა, რომელიც გერმანიაში ცხოვრობდა და ე.წ. ისლამური სახელმწიფოს (IS) მიმდევარი იყო. ის დახმარებას უწევდა ავსტრიელ თინეიჯერს ტეილორ სვიფტის კონცერტზე ბომბის აფეთქების დაგეგმვაში. კონცერტები 2024 წლის აგვისტოში ვენაში, ერნსტ ჰაპელის სტადიონზე უნდა გამართულიყო, თუმცა შოუები ჩაიშალა მას შემდეგ, რაც ავსტრიის უსაფრთხოების სამსახურმა და პოლიციამ თავდასხმის გეგმა დროულად გამოავლინა და აღკვეთა.
ბრალდების მიხედვით, მოჰამედ ა. სავარაუდოდ, კონტაქტში იყო თავდასხმის მთავარ ორგანიზატორთან – 19 წლის ავსტრიელ მოქალაქესთან. პროკურატურის ინფორმაციით, მოჰამედ ა.-მ თარგმნა ბომბის დამზადების ინსტრუქციები, გააგზავნა ე.წ. ერთგულების ფიცი ისლამური სახელმწიფოსადმი და მთავარ ბრალდებულს ტერორისტული ქსელის სხვა წევრთან კავშირის დამყარებაში დაეხმარა.
მთავარი ეჭვმიტანილი – 19 წლის ავსტრიელი – 7 აგვისტოს, დაგეგმილი კონცერტის წინ დააკვეს. მასთან ერთად დააკავეს 17 წლის სავარაუდო თანამზრახველიც, ხოლო ორი დღის შემდეგ ავსტრიის პოლიციამ კიდევ ერთი – 18 წლის ეჭვმიტანილი აიყვანა.
ტერორისტული გეგმის აღკვეთის შემდეგ ტეილორ სვიფტის Eras Tour გაგრძელდა, თუმცა უსაფრთხოების დამატებითი ზომებით.
მომღერლის წარმომადგენლებს ოფიციალური კომენტარი არ გაუკეთებიათ, თუმცა თავად სვიფტი ამ თემას ინსტაგრამზე გამოქვეყნებული ვრცელი პოსტით გამოეხმაურა მას შემდეგ, რაც ტურნეს ევროპული ეტაპი დასრულდა. „ამ ამბავმა შიში და უდიდესი დანაშაულის გრძნობა მომგვარა – იმდენი ადამიანი ემზადებოდა ამ კონცერტებისთვის. მაგრამ ამავდროულად მადლიერი ვიყავი სამართალდამცავი ორგანოების, რადგან მათი დამსახურებით, გაუქმებულ შოუებზე ვდარდობდით და არა – ადამიანების სიცოცხლეზე,“ – დაწერა სვიფტმა.
