ქართველმა არტისტმა Saphileaum (ანდრო გოგიბედაშვილი) ახალი ალბომი გამოუშვა. ალბომის სახელწოდებაა Tamalungma და ის კალიფორნიულმა ლეიბლმა – Pinchy & Friends-მა ფირფიტაზე გამოსცა.
ალბომის შესახებ არტისტი Billboard Georgia-ს ესაუბრა:
„ლეიბლი შარშან აღმოვაჩინე და მალევე შემიყვარდა, რადგან მასთან რამდენიმე ჩემი საყვარელი არტისტი თანამშრომლობს. ლეიბლთან კონტაქტი სოციალური ქსელების მეშვეობით მქონდა და შემდეგ უკვე თანამშრომლობაც შედგა. რაც შეეხება ალბომს, ის იმ ხაზს მიუყვება, რაც ჩემთვის საყვარელია: მისტიკა და იდუმალი ისტორიები. „ტამალუნგმა” ჩემი გამოგონილი სახელია. ინსპირაცია ჯომოლუნგმაა და მიანიშნებს სხვა განზომილების ადგილს, სადაც ბუნების ელემენტარული სულები შენს ნამდვილ თავთან დაბრუნებაში გეხმარებიან. სხვა ალბომებისგან განსხვავებით, აქ მეტად მაქვს გამოყენებული კლასიკური და აკუსტიკური საკრავები, და მუსიკის არქიტექტურაც ოდნავ განსხვავდება.“
როგორც Saphileaum აღნიშნავს, ლეიბლთან თანამშრომლობის გაგრძელებას და Tamalungma 2-ის გამოცემას გეგმავს. არტისტის თქმით, წელს მსმენელს კიდევ ერთ EP-ისაც წარუდგენს. ნამუშევრის სახელწოდებაც უკვე ცნობილია – მას Heavenly Hills ერქმევა და ავსტრალიაში გამოიცემა.
