LL Cool J ახალი დოკუმენტური სერიალის ფარგლებში ამერიკული ფეხბურთის ლეგენდასთან, პეიტონ მენინგთან ერთიანდება. Hip Hop Was Born Here – ასე ჰქვია პროექტს, რომლის პრემიერაც 22 ივლისს Paramount+-ზე შედგება.
ხუთი ეპიზოდისაგან შემდგარი სერიალის პირველი ტრეილერი 27 ივნისს გავრცელდა. ვიდეოში LL Cool J მაყურებელს ნიუ-იორკის ჰიპ-ჰოპის ისტორიაში ამოგზაურებს – რეპერი ესაუბრება როგორც ძველი თაობის, ისე ახალი სკოლის წარმომადგენელ ნიუ-იორკელ რეპერებს, რათა გადმოსცეს, როგორ ჩამოყალიბდა ჰიპ-ჰოპის მექა იმ სახით, როგორსაც დღეს ვიცნობთ.
„თუ გინდათ, დღეს ჰიპ-ჰოპის ძალა გაიგოთ, უნდა დაბრუნდეთ იქ, სადაც ეს ყველაფერი დაიწყო,“ – ამბობს LL Cool J ტრეილერში, როცა ბრონქსის ქუჩებში დადის – იქ, სადაც 70-იან წლებში DJ Kool Herc უკრავდა და კულტურა იბადებოდა.
პეიტონ მენინგმა, რომელიც სერიალის აღმასრულებელი პროდიუსერია, თავისი კომპანიის, Omaha Productions-ის სახელით განაცხადა:
„ჩვენ გაგვიმართლა, რომ ვთანამშრომლობთ LL Cool J-სთან, Rock the Bells-სთან და Paramount-თან. მართალია, მუსიკა ჩემი სფერო ნამდვილად არ არის, მაგრამ სპორტსა და მუსიკას ბევრი საერთო აქვს – ორივე მოითხოვს შრომას, თავდადებას და ორივე მათგანი, საუკეთესო შემთხვევაში, ადამიანებს აერთიანებს. ჰიპ-ჰოპის ისტორია, განსაკუთრებით ნიუ-იორკში, აუცილებლად მოსაყოლი ისტორიაა და მის თხრობას ტოდზე (LL Cool J-ის ნამდვილი სახელი – ტოდ სმითი) უკეთესად ვერავინ გაართმევდა თავს.“
სერიალში ნიუ-იორკის ჰიპ-ჰოპის ლეგენდებიც ჩნდებიან: Big Daddy Kane, Doug E. Fresh, Method Man, Rev Run, ასევე Jadakiss, Sheek Louch, Roxanne Shante, Lady London, Bimmy, Marley Marl და Grandmaster Caz.
სერიალი – Hip Hop Was Born Here სტრიმინგ სერვისზე 22 ივლისიდან გამოჩნდება.
ნახეთ ტრეილერი:
