ამერიკელი რეპერის, Diddy-ს ვაჟი – კინგ კომბსი მამის ნაწილობრივი გამართლების შემდეგ სასამართლოს შენობის წინ პრესასთან გამოჩნდა და ვერდიქტის შესახებ ისაუბრა.
ჟურნალისტებთან საუბრისას კინგ კომბსმა მადლიერება გამოხატა: „გვიყვარხართ ყველა, გვიყვარხართ ისინი, ვინც გვიყურებთ. ძალიან ბედნიერი ვარ. მამა სახლში მოდის. ღმერთმა დალოცოს მთელი მსოფლიო,“ – თქვა კომბსმა.
2 ივლისს Diddy სექსუალური ტრეფიკინგისა და რეკეტის ბრალდებებში უდანაშაულოდ ცნეს, თუმცა პროსტიტუციის ორგანიზებისა და ხელშეწყობის ნაწილში ის დამნაშავედ გამოცხადდა.
შვიდკვირიანი სასამართლო პროცესის დასასრულს, ორდღიანი მსჯელობის შემდეგ, მოსამართლე საბოლოო ვერდიქტზე შეთანხმდა.
Diddy საპატიმროში 2024 წლის 16 სექტემბიდან იმყოფება. რეპერის საქმესთან დაკავშირებით თავდაპირველი სკანდალი მის ყოფილ პარტნიორს, კეისი ვენტურას უკავშირდება, რომელმაც 2023 წლის ნოემბერში სასამართლოში სარჩელი შეიტანა და Diddy წლების განმავლობაში ფიზიკურ და ფსიქოლოგიურ ძალადობაში დაადანაშაულა. Billboard-თან გაკეთებულ განცხადებაში მისი ადვოკატი დაგლას ვიგდორი ამბობს:
„სისხლის სამართლის პროცესი იმით დაიწყო, რომ ჩვენს კლიენტს, კეისი ვენტურას, ეყო სიმამაცე, საჯაროდ ეთქვა სიმართლე და სასამართლოსთვის მიემართა. მიუხედავად იმისა, რომ Diddy სექსტრეფიკინგში დამნაშავედ არ ცნეს საკმარისი მტკიცებულებების არქონის გამო, კეისის ძალისხმევამ გზა გაუხსნა მის გამამტყუნებელ ვერდიქტს. კეისიმ ამ გამბედაობით წარუშლელი კვალი დატოვა როგორც შოუბიზნესში, ასევე სამართლიანობისთვის ბრძოლაში,“ – განაცხადა ვიგდორმა.
Diddy-სა და მისი ადვოკატების მხრიდან სააპელაციო სარჩელის შეტანა თითქმის გარდაუვალია მას შემდეგ, რაც საბოლოო სასჯელი გამოცხადდება. ამ ეტაპზე კი რეპერი პატიმრობაში რჩება, რადგან გირაოს შეფარდება კვლავაც უარყოფილია.
