ოლივია როდრიგო და გრეისი აბრამსი თავიანთ პლატფორმებს მსოფლიოში მიმდინარე მოვლენებზე ყურადღების გასამახვილებლად იყენებენ: ვარსკვლავები გამოეხმაურნენ ღაზის ტერიტორიაზე სამხედრო ოპერაციების შედეგად დაზარალებულებს – განსაკუთრებით ბავშვებს, რომლებიც ღაზაში მიმდინარე ძალადობის ფონზე შიმშილით იტანჯებიან.
22 ივლისს ორივე პოპვარსკვლავმა „ინსტაგრამის სთორიში“ ერთი და იგივე პოსტი გააზიარა – ეს არის ბავშვებისთვის განკუთვნილი კონტენტ კრეატორის, Ms. Rachel-ის პოსტი, რომელიც დიდი ხანია, ღიად უჭერს მხარს პალესტინელებს და ჰუმანიტარული დახმარების მიწოდებას ითხოვს ღაზის იმ რეგიონებისთვის, სადაც შიმშილი უკვე თითქმის ორი წელია მძვინვარებს. ამ ტერიტორიაზე მოსახლეობა ომის შედეგად უკიდურეს ტანჯვას განიცდის.
„არასოდეს მიფიქრია, რომ ოდესმე ვიხილავდი ჩვილების განზრახ შიმშილით მკვლელობის ფაქტს იმ დროს, როცა საკვები და რძის ფხვნილები დაურიგებლად ინახება მათგან სულ რამდენიმე მილის დაშორებით. არასოდეს მეგონა, რომ ადამიანები, რომლებიც ყოველთვის ბავშვის უფლებებს იცავდნენ, ამას საკუთარი თვალით იხილავდნენ და მაინც დუმილს ამჯობინებდნენ,“ – წერია პოსტში.
როდრიგომ და აბრამსმა მოიწონეს ეს პოსტი ავტორის ინსტაგრამზე და შემდეგ საკუთარ „სთორიშიც“ გააზიარეს. ორივე ვარსკვლავი იმ უამრავ ცნობილ სახეს შორისაა, რომლებმაც პალესტინელების მიმართ სოლიდარობა გამოხატეს. Reuters-ის ინფორმაციით, ისრაელის სამხედრო ქმედებების შედეგად უკვე დაახლოებით 60 000 პალესტინელი დაიღუპა. 2023 წელს აბრამსმა ხელი მოაწერა მოწოდებას Artists4Ceasefire-ის წერილზე, რომელსაც ასევე შეუერთდნენ დრეიკი, ჯენიფერ ლოპესი, დუა ლიპა და სხვა მრავალი არტისტი. ბოლო კვირების განმავლობაში ლანა დელ რეიმ ინსტაგრამზე დაწერა, რომ ყოველდღე ლოცულობს პალესტინელებისათვის, ხოლო ბილი აილიშმა გააკრიტიკა ისრაელის „შემაძრწუნებელი“ გეგმა, რომელიც პალესტინელების იძულებით გადაყვანას ითვალისწინებს ღაზას სხვა რეგიონში.
ივლისის დასაწყისში როდრიგომ პირადი გზავნილიც გაავრცელა, რომელშიც ღაზაში არსებული „შემზარავი და სრულიად მიუღებელი“ მდგომარეობა დაგმო. „არ არსებობს სიტყვები იმ გულისტკივილის გადმოსაცემად, რასაც განვიცდი, როცა ღაზაში უდანაშაულო პალესტინელი ხალხი – დედები, მამები და ბავშვები შიმშილობენ. მათ არ აქვთ წყალი და არ ეძლევათ წვდომა ძირითად სამედიცინო სერვისებსა და ჰუმანიტარულ დახმარებაზე,“ – დაწერა როდრიგომ.
