Forget Tomorrow World Tour-ის დასრულებიდან ერთი დღის შემდეგ ჯასტინ ტიმბერლეიკმა გაამხილა, რომ ტურნეს პარალელურად ლაიმის დაავადებას ებრძოდა.
ინსტაგრამის პოსტში პოპვარსკვლავმა ტურნეს ფოტოები გააზიარა და დაწერა: „რადგან ტურნეს ვაჯამებ, მინდა, რომ ცოტა მეტი გითხრათ, თუ რა ხდება ჩემს თავს.
სხვა პრობლემებთან ერთად, რაც ჩემს ჯანმრთელობას ეხება, ლაიმის დაავადების დიაგნოზიც დამისვეს. ამას იმიტომ არ ვამბობ, რომ შეგეცოდოთ, არამედ იმიტომ, რომ ნათელი მოვფინო იმას, თუ რისი გადატანა მიწევდა სცენის მიღმა.
თუ ეს დაავადება გამოგიცდიათ ან იცნობთ ვინმეს ამ დიაგნოზით, მაშინ გეცოდინებათ, რომ მასთან ერთად ცხოვრება განუწყვეტელი გამოფიტვაა როგორც მენტალურად, ასევე ფიზიკურად. როცა დიაგნოზი პირველად გავიგე, შოკში ჩავვარდი. მაგრამ მინიმუმ იმის მიზეზი გავარკვიე, თუ რატომ მქონდა ძლიერი ტკივილი სცენაზე ან რატომ ვგრძნობდი გიჟურ დაღლილობასა და სისუსტეს. დავდექი პირადი არჩევანის წინაშე: შევწყვიტო ტურნე? თუ განვაგრძო და მისი გამკლავების გზები ვიპოვო. საბოლოოდ კი გადავწყვიტე, რომ სიამოვნება, რომელსაც სცენაზე დგომა მანიჭებს, დიდად აღემატებოდა იმ სტრესს, რომელსაც ჩემი სხეული განიცდიდა. და ბედნიერი ვარ, რომ ტურნეს გაგრძელება ავირჩიე.”
ლაიმის დაავადებას იწვევს ბაქტერია ბორელია, რომლის გადამტანიც ზოგიერთი ტკიპაა. ადამიანებს, როგორც წესი, დაავადება ტკიპის ნაკბენის შედეგად უვითარდებათ. სიმპტომები მოიცავს ცხელებას, სხეულის ტკივილს, გაშეშებას, კუნთების სისუსტესა და იმუნური სისტემის პრობლემებს.
ტიმბერლეიკი არ არის პირველი მუსიკოსი, ვინც ლაიმის დაავადებაზე ისაუბრა. შენაია ტვეინი, ავრილ ლავინი, ჯასტინ ბიბერი მათ შორის არიან, ვისაც ეს დიაგნოზი საკუთარ თავზე გამოუცდიათ და მასთან ბრძოლაზე საჯაროდ უსაუბრიათ.
Forget Tomorrow World Tour ტიმბერლეიკმა 2024 წლის აპრილში, ალბომ Everything I Thought It Was-ის გამოცემიდან ერთი თვის შემდეგ დაიწყო. „ბილბორდის” მონაცემებით, აღნიშნულმა ტურნემ პოპვარსკვლავს მეათე ადგილი მოუტანა ყველაზე მაღალშემოსავლიანი ტურნეს არტისტების რეიტინგში.
