ოზი ოსბორნის დაკრძალვიდან ერთი კვირის შემდეგ მომღერლის ვაჟმა ჯეკ ოსბორნმა მამას გამოსამშვიდობებელი წერილი მიუძღვნა.
„მამაჩემის გარდაცვალების შემდეგ არაფრის დაპოსტვა არ მინდოდა. ამისთვის ზედმეტად დამძიმებული ვიყავი. მოკლედ დავწერ, რადგან მას სძულდა გრძელი სიტყვები,” – წერს ოზისა და შერონ ოსბორნების 39 წლის ვაჟი ინსტაგრამზე. „ის ძალიან ბევრს ნიშნავდა უამრავი ადამიანისთვის, მაგრამ მე იღბლიანი ვარ, რომ იმ მცირე ჯგუფს მივეკუთვნები, ვინც მას მამას ეძახდა.”
ჯეკის პოსტს თან ახლავს ვიდეო, რომელშიც მისი და ოზის ცხოვრების სხვადასხვა მომენტია გაერთიანებული, ჯეკის ბავშვობიდან ზრდასრულობამდე. ვიდეოს ფონად გასდევს ოზის სენტიმენტალური ბალადა So Tired, მისი 1983 წლის სოლო ალბომიდან Bark at the Moon.
„ჩემი გული სავსეა სევდითა და მწუხარებით, მაგრამ ასევე დიდი სიყვარულითა და მადლიერებით. მე 14,501 დღე გავატარე ამ კაცთან ერთად და ვიცი, რომ ეს საჩუქარია.”
კლიპი სრულდება ფოტოების სერიით, სადაც ოზი თავის შვილებთან ერთად იცინის და სასაცილო სახეებს იღებს შვილიშვილებთან ერთად, ასევე არქივის მასალით, სადაც ის პატარა ჯეკს აუდიტორიასთან დამშვიდობებასა და თავის დაკვრას ასწავლის.
„ეს მამაჩემი იყო. მან იცხოვრა და იცხოვრა სავსე ცხოვრებით. მიყვარხარ, მამა,” – წერს ოსბორნი.
ცოტა ხნის წინ მამას პოსტი მიუძღვნა ჯეკის დამ, კელი ოსბორნმაც და ფანებს მხარდაჭერისთვის მადლობა გადაუხადა.: „ასჯერ დავჯექი ამის დასაწერად და მაინც არ ვიცი, იქნება თუ არა სიტყვები საკმარისი… მაგრამ მთელი გულით გიხდით მადლობას. ის სიყვარული, მხარდაჭერა და თბილი მესიჯები, რაც ბევრი თქვენგანისგან მივიღე, ძალიან დამეხმარა ჩემი ცხოვრების ყველაზე რთულ მომენტთან გამკლავებაში. თითოეული კეთილი სიტყვა, გაზიარებული მოგონება, იმაზე მეტს ნიშნავს, ვიდრე ამის ახსნა შემიძლია… გარკვეული პერიოდის განმავლობაში კარგად ვერ ვიქნები, მაგრამ იმის ცოდნა, რომ ჩემი ოჯახი მარტო არ არის ამ ტკივილში, ძალიან მნიშვნელოვანია. ვეჭიდები იმ სიყვარულს, სინათლესა და მემკვიდრეობას, რაც მან დატოვა.”
ოზი ოსბორნი 22 ივლისს 76 წლის ასაკში გარდაიცვალა. გარდაცვალების მიზეზად გულის გაჩერება და კორონარული არტერიების დაავადება სახელდება.
