9 აგვისტოს ევროპის ერთ-ერთი ყველაზე ცნობილი საკონცერტო დარბაზის, ბერლინის „კონცერტჰაუსის” სცენაზე თბილისის ახალგაზრული ორკესტრი წარდგა. ორკესტრს მისი ხელმძღვანელი მირიან ხუხუნაიშვილი დირიჟორობდა. კონცერტში მონაწილეობდა ქართველი ვირტუოზი პიანისტი ცოტნე ზედგინიძეც.
საღამოზე შესრულდა ლაშა ხარხელაურის, მოცარტისა და ბეთჰოვენის ნაწარმოებები. კონცერტის შემდეგ კი სოციალურ ქსელში განსაკუთრებულად ემოციური ვიდეო გავრცელდა, რომელშიც საღამოს დასასრულს თბილისის ახალგაზრდული ორკესტრის ხელმძღვანელი მირიან ხუხუნაიშვილი აუდიტორიას მიმართავს, რის შემდეგაც ორკესტრთან ერთად „მრავალჟამიერს” ასრულებს:
„მინდა თქვენი ყურადღება გავამახვილო ორ მნიშვნელოვან თარიღზე: დღეს 17 წელი შესრულდა 2008 წლის აგვისტოს ომიდან, როცა რუსეთი შემოიჭრა საქართველოში. ამიტომ ჩვენ პატივს მივაგებთ ქართველ გმირებს, რომლებიც ჩვენს ქვეყანას იცავდნენ. მეორე თარიღი, ეს არის გია ყანჩელის 90 წლის იუბილე – ერთ-ერთი უდიდესი ქართველი კომპოზიტორის, რომლის სახელსაც ატარებს ჩვენი ორკესტრი. მომავლის იმედით, ჩვენ გვინდა, შეგისრულოთ ქართული ტრადიციული სიმღერა „მრავალჟამიერი”.
ისტორიული მნიშვნელობის კონცერტი სრული ანშლაგით გაიმართა. ღონისძიებამდე რამდენიმე საათით ადრე მირიან ხუხუნაიშვილმა სოციალურ ქსელში დაწერა, რომ 1700-კაციანი დარბაზის ყველა ბილეთი გაყიდული იყო.
