მუსიკოსი და პროდიუსერი, Death Row Records-ის დამფუძნებელი Suge Knight მიიჩნევს, რომ დრეიკი Death Row Records-ის ყალბ გულსაკიდს ატარებს და ამ ნივთის მფლობელი თუფაქი არასდროს ყოფილა.
კვირის დასაწყისში პოდკასტი The Art of Dialogue ნაითს დაუკავშირდა, რომელიც ამჟამად კალიფორნიის ციხეში 28-წლიან სასჯელს იხდის. Death Row-ს დამფუძნებელმა განაცხადა, რომ ლეიბლის ძეწკვის შექმნის იდეა მას ეკუთვნის და პირველი ეგზემპლარი სნუპ დოგს გადასცა.
„ჩემამდე Death Row-ს გულსაკიდის გაკეთება არავის უფიქრია,” – განმარტა ნაითმა. მისი თქმით, ეს არტისტისთვის ისეთივე ნივთი იყო, როგორიც საკუთარი დროშა ან სიმბოლური ნიშანი.
1995 წელს, როცა ნაითმა თუფაქი ციხიდან გირაოთი გამოიყვანა, დაჰპირდა, რომ საკუთარი Death Row Records-ის მედალიონი ექნებოდა. თუმცა 2Pac-მა მოისურვა არა ახალი, არამედ ის, რომელიც თავად Suge-ს ეკეთა.
„მითხრა: შენ ჩემი დიდი ძმა ხარ. შენი გულსაკიდი მინდა, ეს უფრო მნიშვნელოვანია. ახალი არ მინდა, მინდა ის, რაც შენ გიკეთია,“ – გაიხსენა ნაითმა.
შემდეგ Suge-მა დრეიკი გააკრიტიკა იმის გამო, რომ ყალბ მედალიონს ატარებს და მოუწოდა მას, პასუხი მოეთხოვა იმ იუველირისთვის, რომელმაც, როგორც ჩანს, მოატყუა. „ეს თუფაქის გულსაკიდი არ არის. ეს Death Row-ს მედალიონი არ არის,” – განაცხადა Suge Knight-მა.
დრეიკმა 24 აგვისტოს ინსტაგრამზე ფოტო გამოაქვეყნა, სადაც, სავარაუდოდ, 2Pac-ის 1996 წლის Death Row Records-ის ძეწკვია გამოსახული. ლეიბლის ლოგო ძვირფასი თვლებით არის მოჭედილი, ხოლო ოქროს მედალიონის უკანა მხარეს აწერია: „All Eyez on YOU 1996.“ დრეიკის პოსტს თან ერთვოდა All Eyez On Me-ს ყდის ფოტო, სადაც თუფაქი ასეთივე გულსაკიდს ატარებს.
გარდა ამისა, 2023 წელს დრეიკმა გაამხილა, რომ ფლობდა ძვირფას სამკაულს – გვირგვინის ფორმის ბეჭედს, რომელიც 2Pac-ს ეკუთვნოდა. სოთბის აუქციონმა დაადასტურა, რომ დრეიკმა ეს სამკაული 1.1 მილიონ დოლარად შეიძინა. აღნიშნული ბეჭედი თუფაქს მისი ცხოვრების უკანასკნელი საჯარო გამოჩენისას – 1996 წლის MTV Video Music Awards-ზე ეკეთა.
