მსოფლიო შოუ-ბიზნესის მთავარი თემა კვლავაც ტეილორ სვიფტისა და ტრევის კელსის ნიშნობაა. 26 აგვისტოს წყვილმა ინსტაგრამზე გაავრცელა პოსტი, რომლითაც გულშემატკივარს სასიხარულო ამბავი აუწყა. თუმცა, როგორც აღმოჩნდა, კელსის ოჯახისთვის ეს სიახლე არ ყოფილა. ფეხბურთელის მამა ედ კელსი ამბობს, რომ მისმა ვაჟმა სვიფტს ხელი თვის დასაწყისში სთხოვა.
„ტრევისმა სინამდვილეში ტეილორს ხელი ორი კვირის წინ სთხოვა. ის აპირებდა, რომ ცერემონია ამ კვირისთვის გადაედო. ტეილორი ცოტას ნერვიულობდა, მაგრამ ტრევისს ხელის თხოვნის გადადება სურდა, რათა რაღაც გრანდიოზული მოემზადებინა. მე კი მას განუწყვეტლივ ვუმეორებდი: შეგიძლია ეს გზის პირზეც კი გააკეთო, ნებისმიერ ადგილას… ის მაინც განსაკუთრებულად იქცევა, როცა დაიჩოქებ და ხელს სთხოვ,” – ამბობს ედ კელსი ახალ ინტერვიუში.
საბოლოოდ ტრევისმა ტეილორს ხელი საკუთარი სახლის ეზოში სთხოვა. „სადილზე უნდა წასულიყვნენ, რა დროსაც ტრევისმა უთხრა: „მოდი, გარეთ გავიდეთ და ერთი ბოკალი ღვინო დავლიოთ”. ეზოში გავიდნენ და სწორედ ამ დროს სთხოვა მას ხელი. ეს მშვენიერი იყო. შემდეგ კი ვიდეოზარით დაგვირეკეს მე, დედებს და ყველას გაგვაგებინეს ახალი ამბავი. მათი ერთად ნახვა შესანიშნავია. უბრალოდ ორი ახალგაზრდა ადამიანია, რომელთაც ძალიან უყვართ ერთმანეთი. ისინი არ ეძებენ ყურადღებას, მაგრამ ეს ბუნებრივად ხდება, როცა ასეთი წარმატებული არიან საკუთარ სფეროებში,” – ამბობს კელსი.
წყვილის ნიშნობის პოსტმა ინსტაგრამის რეკორდი დაამყარა და 6 საათში ახალ ისტორიულ ნიშნულს მიაღწია. „მეტას” მიერ „ბილბორდისთვის” გაზიარებული მონაცემების მიხედვით, ფეხბურთელისა და მომღერლის საერთო პოსტმა ინსტაგრამზე მილიონი გაზიარება დააგროვა, რაც ყველა დროის ყველაზე მაღალი მაჩვენებელია, რაც კი რაიმე პოსტს ოდესმე ჰქონია. ამ ყველაფერს კიდევ უფრო შთამბეჭდავს ხდის ის ფაქტი, რომ წყვილმა აღნიშნული რეკორდი სულ რაღაც 6 საათში დაამყარა.
