CES Records-ზე ქართველი ჰიპ-ჰოპ არტისტის Denivarlevy-ს, იგივე ლევან ოქროპირიძის EP სახელწოდებით „ნელა“ გამოიცემა.
Denivarlevy 22 წლის ჰიპ-ჰოპ პროდიუსერია რუსთავიდან. მისი დისკოგრაფია საკმაოდ მრავალფეროვანია და მოიცავს უკვე რვა ალბომს და ოთხ EP-ის. არტისტის მუსიკალური სტილი აერთიანებს ჰიპ-ჰოპს, თრეფსა და ელექტრო რეპს. Denivarlevy-ს მუსიკალურ საქმიანობაში ხშირია კოლაბორაციები სხვადასხვა არტისტთან. მათ შორის არიან: Meme Musicc, Gigilow, Sis9, Database და სხვები.
„ნელა“ CES Records-ის რიგით 56-ე გამოცემაა. როგორც ლეიბლის რელიზში ვკითხულობთ, „ნელა“ ერთგვარი გამოწვევაა, რადგანაც ეს CES Records-ის პირველი რელიზია ჰიპ-ჰოპ ჟანრში. თავად არტისტისთვისაც ეს EP განსაკუთრებულია, რადგანაც მისი პირველი ქართულენოვანი ალბომია, რომელშიც თავადვე რეპავს.
„ნელა“ აერთიანებს ოთხ მოკლე კომპოზიციას. ალბომის პირველი სინგლი, სახელწოდებით „I. Z. A“ უკვე ყველა ციფრულ სტრიმინგ პლატფორმაზეა ხელმისაწვდომი.
სრული EP-ის გამოსვლის თარიღი 29 აგვისტოა. ამავე დღეს Fabrika-ს მულტიფუნქციურ სივრცეში შედგება ალბომის პრეზენტაცია და სერიის – Denivarlevy & Friends-ის დასკვნითი ღონისძიება.
პოსტერის დიზაინი: თამარი ჯაფარიძე
ეს არტისტის ბოლო მუსიკალური ლაივი იქნება საქართველოში, რადგან უახლოეს მომავალში ლევან ოქროპირიძე გერმანიაში გადადის. ის სწავლას იწყებს გერმანიის ერთ-ერთ წამყვან აუდიოხელოვნების ინსტიტუტში.
„ნელა“ ხელმისაწვდომი იქნება როგორც ციფრულად, ასევე ე.წ. Flexi Disc-ის სახით. მისი შეძენა შესაძლებელი იქნება 5 სექტემბრიდან, თბილისის ფირფიტების მაღაზიებში.
იხილეთ ალბომის კრედიტები:
მუსიკის შემქმნელი და პროდიუსერი: Denivarlevy
მასტერინგი: გიორგი ქორიძე
ალბომის ყდის ავტორი: თამარ ჯაფარიძე
