სანდრო ნებიერიძე ფერუჩიო ბუზონის საერთაშორისო საფორტეპიანო კონკურსის ფინალისტია. ქართველი პიანისტი იმ სამ კონკურსანტს შორის დასახელდა, რომლებიც 7 სექტემბერს გრანდ ფინალში დაუკრავენ. კონკურსის დასკვნითი ღონისძიება ბოლცანოში, Teatro Comunale-ში გაიმართება და პირდაპირი ეთერით გადაიცემა ორ სატელევიზიო არხზე, რადიოსადგურებსა და ონლაინ პლატფორმებზე. მონაწილეები სცენაზე ჰაიდნის ორკესტრთან ერთად წარდგებიან. მათი გამოსვლის შემდეგ კი ჟიური კონკურსის გამარჯვებულს დაასახელებს. ასევე გამოვლინდება აუდიტორიის რჩეულიც, რომელსაც მაყურებელი ხმის მიცემით აირჩევს.
სანდრო ნებიერიძემ ფინალამდე სამი ეტაპი გადალახა და 114 მონაწილიდან, ჯერ 34 კონკურსანტს შორის, შემდეგ კი საუკეთესო თორმეტეულსა და ექვსეულში მოხვდა. 2 სექტემბერს ქართველი პიანისტი ჟიურის წინაშე კამერული მუსიკის ტურში წარდგა, რომლითაც გრანდ ფინალის საგზური მოიპოვა.
აუდიტორიის პრიზისთვის ხმის მიცემა შესაძლებელია ბმულზე: https://competition-2025.busoni-mahler.eu/login/#/
