7 სექტემბერს ოზი ოსბორნის მუსიკალური პარტნიორები და კოლეგები 2025 წლის MTV VMAs-ის სცენაზე წარდგებიან, რათა მეტალის ლეგენდას პატივი მიაგონ. გავრცელებული განცხადების მიხედვით, Aerosmith-ის სოლისტი სტივენ ტაილერი და გიტარისტი ჯო პერი Yungblud-ისა და Extreme-ის ნუნო ბეტანკურს შეუერთდებიან წლევანდელ ცერემონიაზე, რომელიც CBS-ის საღამოს პირდაპირი ეთერით გადაიცემა. როკ-მუსიკოსები სცენაზე ოსბორნის უდიდეს ჰიტებს შეასრულებენ. ოსბორნი არა მხოლოდ ჰარდ-როკის ერთ-ერთი ყველაზე თვალსაჩინო ფიგურა იყო, არამედ MTV-სთანაც დიდი ისტორია აკავშირებდა – დაწყებული 1980-იანების Headbanger’s Ball-ში გამოჩენით, დასრულებული რეალითი შოუ – The Osbournes-ით, რომელიც MTV-ის არხზე 2002-2005 წლებში გადიოდა. შოუ ოსბორნის ოჯახურ ცხოვრებას ასახავდა და მაყურებელს მუსიკოსის შესახებ სცენის მიღმა დეტალებს უზიარებდა.
ოზი ოსბორნი 22 ივლისს 76 წლის ასაკში გარდაიცვალა, სულ რამდენიმე კვირის შემდეგ, რაც სცენაზე ბოლოჯერ გამოვიდა საკუთარ ქალაქ ბირმინგემში გამართულ დიდ კონცერტზე, სახელწოდებით – Back to the Beginning. შოუში მონაწილეობდნენ Metallica, Slayer, Pantera, Mastodon, Lamb of God, Anthrax, Alice in Chains და ბევრი სხვა შემსრულებელი. Yungblud-მა და ნუნო ბეტანკურმა Sleep Token II-თან ერთად შეასრულეს Black Sabbath-ის სიმღერის, Changes-ის ქავერი. ბეტანკური ასევე შეუერთდა Rage Against the Machine-ის ტომ მორელოსა და Quiet Riot/Ozzy-ს ბასისტ რუდი სარზოს, რათა შეესრულებინათ Symptom of the Universe და კიდევ არაერთი სიმღერა Sabbath-ისა და ოზის სოლო რეპერტუარიდან.
ოზისადმი მიძღვნილი შოუს გარდა, VMAs-ის ცერემონია მრავალფეროვანი მუსიკალური პროგრამით გამოირჩევა. სცენაზე ასევე გამოვლენ: მერაია ქერი, ლედი გაგა, ტეიტ მაკრეი, ალექს უორენი და საბრინა კარპენტერი. ცერემონიაზე ბასტა რაიმსს MTV VMA Rock the Bells Visionary Award გადაეცემა, ხოლო რიკი მარტინი პირველ Latin Icon Award-ს მიიღებს.
იხილეთ MTV-ის პრომო, რომელიც ოზი ოსბორნისადმი მიძღვნილი ცერემონიის სპეციალურ მუსიკალურ ნაწილს აანონსებს:
