ქართული პოსტ-პანკ ბენდის, SKAZZ-ის ახალი ალბომი MAXE სექტემბრის დასაწყისში გამოვიდა, მასში რვა კომპოზიციაა გაერთიანებული. 19 სექტემბერს კი ამ ალბომში შესული სიმღერის, TALGA-ს ვიდეოკლიპის პრემიერა შედგა. ბენდმა ვიდეო პროფესიონალური გუნდით დაკომპლექტებულ კრეატიულ სტუდია ADHD Production-თან თანამშრომლობით შექმნა.
SKAZZ-ის ვოკალისტი საბა ვაშაყმაძე:
,,ტალღას” იდეა რეჟისორ მარიამ ჭაჭიასთან საუბრის დროს დაიბადა. ეს სიმღერაც მისი ფილმისთვის შეიქმნა. მადლობა მინდა გადავუხადო მას ამისთვის. ბენდის წევრებისთვისაც ერთ-ერთი საყვარელი ტრეკია და როცა გიორგი შაკაიამ შემოგვთავაზა ერთად მუშაობა, ძალიან გაგვიხარდა. ვიცოდით, რომ adhd production-ში თავისი საქმის პროფესიონალები არიან და პარალელურად, ჩვენთვისაც “ამ დონის” პირველი ვიდეო კლიპი იქნებოდა, პირველად მოგვიწევდა ამ სახით გადასაღებ მოედანზე მუშაობა. ვიდეო ბათუმში, გემზე გადავიღეთ, რაც ჩვენი მეგობრის, დავით მელიქიშვილის დამსახურებაა. ადგილზე სხვა მეგობრებიც შემოგვიერთდნენ და მთელი სამუშაო დღე უზომოდ სასიამოვნო და საინტერესო გამოვიდა. მეორე დღეს კი გადაღებები თბილისში, white rabbit bar-ში გავაგრძელეთ, სადაც ორი პერსონაჟი ჩაერთო ვიდეოში. ამით სიუჟეტის კონტექსტი და შინაარსი შეიკრა. სიმღერა და ვიდეო ჩვენი მეგობრის, ანკა სტურუას ხსოვნას ეძღვნება. “
მოისმინეთ და ნახეთ SKAZZ-ის სიმღერა და კლიპი TALGA:
