ჯონ სტიუარტი და ღამის შოუების სხვა წამყვანები – ჯიმი ფელონი და სტივენ კოლბერტი საგრძნობლად განიცდიან ზეწოლას მას შემდეგ, რაც ABC-მ განუსაზღვრელი ვადით შეაჩერა Jimmy Kimmel Live, მას შემდეგ, რაც კიმელმა მონოლოგში კომენტარები გააკეთა ჩარლი კირკის მკვლელობის შესახებ.
ამ ამბავს დონალდ ტრამპი Truth Social-ზე პოსტით გამოეხმაურა, ხოლო ფედერალური კომუნიკაციების კომისიის თავმჯდომარემ, ბრენდან ქარმა გამაფრთხილებელი გზავნილიც გაავრცელა. ქარის თქმით, უწყება გააუქმებდა იმ მაუწყებლების ლიცენზიებს, რომლებიც კიმელის სიტყვებს გაუშვებდნენ ეთერში. მან ეს „ახალი ამბების დამახინჯებად“ და „ყველაზე არაჯანსაღ ქცევად“ შეაფასა.
ამ მოვლენების ფონზე სტიუარტმა The Daily Show-ს ეთერისას თქვა: „დღეს გვაქვს კიდევ ერთი მხიარული, სასაცილო, ადმინისტრაციისთვის სასურველი შოუ,“ – დაიწყო მან, თან რესპუბლიკელების დამახასიათებელი წითელი ჰალსტუხი ეკეთა. The Daily Show-ს წამყვანმა, როგორც ყოველთვის, შეინარჩუნა ორაზროვანი სიტყვის ოსტატობა და სარკაზმი. მონოლოგში სტიუარტმა სარკასტულად უწოდა ტრამპს „დიდი ლიდერი“, „მზის ღმერთი“ და „მბრძანებელი“.
მიუხედავად შესავლისა, გადაცემა კლასიკური Daily Show აღმოჩნდა. მაყურებელმა იხილა ვიდეოები, სადაც კონსერვატორი წამყვანები სიტყვით თავისუფლებას იცავდნენ, მაგრამ მაშინვე საკუთარ თავს ეწინააღმდეგებოდნენ, როცა საუბარი მათთვის არასასიამოვნო აზრს ეხებოდა. ამას დაემატა Fox News-ის ინტერპრეტაცია 6 იანვრის კაპიტოლიუმზე თავდასხმის შესახებ.
„ჩვენმა დიდმა ადმინისტრაციამ ძალიან მკაფიო წესები დაადგინა სიტყვის თავისუფლების შესახებ,“ – თქვა სტიუარტმა. „ახლა ზოგიერთი სკეპტიკოსი შეიძლება ამტკიცებდეს, რომ ადმინისტრაციის რეაქცია სიტყვის თავისუფლებაზე სინამდვილეში ცინიკურია – ძალაუფლების უპრეცედენტო კონცენტრაციის და დაშინების თანმდევი მოვლენა, პრინციპებისგან დაცლილი. ზოგი ამას იტყოდა. მე კი არა, მე ვფიქრობ, რომ ეს დიდებულია.“
პარალელურად, კოლბერტმა და ფელონმა საკუთარ ეთერში მხარდაჭერა გამოუცხადეს დათხოვნილ კოლეგას. „დღეს საღამოს ჩვენ ყველა ჯიმი კიმელი ვართ,“ – ასე დაიწყო The Late Show-ს მონოლოგი კოლბერტმა, რომლის გადაცემაც CBS-მა მომავალ მაისში უნდა დახუროს. „მე შენს და შენი გუნდის გვერდით ვარ,“ – აღნიშნა მან.
ფელონმაც პოლიტიკური შინაარსით დაიწყო შოუ და ჯიმი კიმელს დაუჭირა მხარი. „გულწრფელად რომ გითხრათ, არ ვიცი, რა ხდება – არავინ იცის. მაგრამ მე ვიცნობ ჯიმი კიმელს: ის არის ღირსეული, მხიარული და მოსიყვარულე ადამიანი. იმედი მაქვს, დაბრუნდება.“
ფელონმა თქვა, რომ The Tonight Show-ს მონოლოგს „როგორც ყოველთვის“ წაიკითხავდა, თუმცა როცა ხუმრობები პრეზიდენტ ტრამპს შეეხებოდა, იგი უხილავი გამომცხადებლის მიერ დაცენზურდებოდა.
