2Pac-ის კლასიკური სიმღერა Brenda’s Got a Baby რეალურ ისტორიაზეა დაფუძნებული. რეპერმა ეს სიმღერა მაშინ დაწერა, როცა Juice-ის გადაღებებზე თავის პირველ მთავარ როლს ასრულებდა. სწორედ ამ პერიოდში გაიგო ამბავი 12 წლის გოგოზე, რომელმაც ახალშობილი ნაგვის მილში ჩააგდო მას შემდეგ, რაც 21 წლის ბიძაშვილმა გააუპატიურა. ამ შემთხვევამ შთააგონა 2Pac-ს სიმღერის დაწერა, რომელიც ამერიკის გეტოში მოზარდთა ორსულობის თემას ეხება. მოგვიანებით ეს ტრეკი გახდა მისი ერთ-ერთი ყველაზე მნიშვნელოვანი ნამუშევარი.
ახლახან ბესტსელერი წიგნების ავტორი ჯეფ პერლმანი სტუმრად იყო The Rich Eisen Show-ში, რათა წარედგინა თავისი ახალი წიგნი – Only God Can Judge Me: The Many Lives of Tupac Shakur („მხოლოდ ღმერთს შეუძლია განმსაჯოს: თუფაქ შაკურის მრავალი ცხოვრება“). გადაცემის დროს მას ჰკითხეს, იყო თუ არა ვინმე, ვინც არ ისურვა მასთან საუბარი, როცა წიგნისთვის მასალას ამზადებდა.
ავტორის თქმით, ასეთები იყვნენ DR. DRE და სნუპ დოგი. “ისინი რთულად მისაწვდომები არიან, მაგრამ სხვებთან დაკავშირებით გამიმართლა – კლასელები, მუსიკალური კოლეგები, Death Row Records-ის თანამშრომლებიც კი ღიად საუბრობდნენ.“
ამის შემდეგ პერლმანმა აღნიშნა, რომ ძალიან ადრე მიაკვლია იმ კაცს, რომელმაც პირველად გაიგონა ბავშვის ტირილი ნაგვის მილთან. პერლმანმა ამ ადამიანს ინტერვიუც ჩამოართვა. თუმცა ყველაზე საინტერესო აღმოჩნდა შეხვედრა ლეილა შტაინბერგთან – თუფაქის ყოფილ მენეჯერთან და მრჩეველთან. სწორედ მან უთხრა, რომ ყოველთვის უკვირდა, მართალი იყო თუ არა ის ამბავი გოგონასა და ბავშვის შესახებ და რა ბედი ეწია იმ ბავშვს. პერლმანისმა მიზნად დაისახა, გაეგო სიმართლე. მან დაიწყო ბავშვის ძებნა. რამდენიმე დღეში მიაკვლია ლას-ვეგასის მცხოვრებს, დეივონ ჰოჯის. როცა ისინი შეხვდნენ, ჰოჯმა უამბო, რომ საკუთარი ნათესავები Ancestry.com-ის მეშვეობით იპოვა და შეხვედრა უკვე გამართა, მაგრამ დედა იქ არ ყოფილა.
პერლმანმა შემდეგ დედის ძებნა დაიწყო და მალევე იპოვა ნიუ-ჯერსიში მცხოვრები ქალი. სწორედ აქ იწყება ყველაზე უცნაური ნაწილი.
ქალმა, რომელსაც დაურეკეს, შოკი და აღტაცება გამოხატა და თქვა, რომ სურდა დაბრუნებულიყო ნიუ-იორკში, რათა შვილს შეხვედროდა. იმავე საღამოს, 34-წლიანი განშორების შემდეგ, დედა და შვილი ერთმანეთს შეხვდნენ.
