კენდრიკ ლამარისა და SZA-ს ჰიტი – Luther, რომელიც Billboard Hot 100-ის პირველ ადგილს იკავებდა, 13 კვირის შემდეგ, 25 ოქტომბერს, ჩარტიდან გავიდა. ეს ნიშნავს, რომ გასულ კვირაში Hot 100-ის პირველ 40 ტრეკში ოფიციალურად არცერთი რეპსიმღერა აღარ ყოფილა.
ყველაზე დაწინაურებულ პოზიციაზე განთავსებული რეპი ამჯერად იყო YoungBoy Never Broke Again-ის Shot Callin, რომელმაც 44-ე ადგილი დაიკავა. Cardi B-ს Safe (Kehlani-ს მონაწილეობით) და BigXthaPlug-ის Hell at Night (Ella Langley-ს მონაწილეობით) 48-ე და 49-ე პოზიციებზე მოხვდნენ.
ბოლო შემთხვევა, როცა Hot 100-ის პირველ 40-ში რეპი საერთოდ არ იყო, 1990 წლის 2 თებერვალს დაფიქსირდა. მაშინ ყველაზე მაღალ პოზიციაზე მყოფი რეპსიმღერა იყო Biz Markie-ს Just a Friend, რომელიც 41-ე ადგილს იკავებდა.
ჩარტიდან რეპსიმღერების ამჟამინდელი დომინაციის დაკარგვაში დიდი როლი შეასრულა Billboard Hot 100-ის მეთოდოლოგიის ბოლო ცვლილებებმა. სიმღერები, რომლებიც ჩარტში დიდი ხნის განმავლობაში არიან, მაგრამ თანდათან პოზიციებს კარგავენ, სრულად ტოვებენ ჩარტს. სწორედ ასეთი ცვლილების შედეგად გავიდა Billboard Hot 100-დან Luther, რომელიც გასულ კვირას 38-ე ადგილზე იყო. Luther ასევე ბოლო რეპი იყო Hot 100-ის პირველ ათეულში.
დამატებითი ფაქტორი იყო ტეილორ სვიფტის The Life of a Showgirl. ახალი ალბომის 12-ივე სიმღერა ბოლო სამი კვირაა, ჩარტის პირველ 40 პოზიციაზეა გადანაწილებული, რაც კიდევ უფრო ამცირებს სივრცეს რეპ ჰიტებისთვის.
Hot 100-ის პირველ 40-ში რეპის არარსებობა ამ ჟანრის კომერციული დომინაციის დროებითი დაქვეითების ნიშანია. ჰიპ-ჰოპის ბაზრის წილი 2020 წელს 30%-ს უახლოვდებოდა, 2023 წელს 25%-ზე ოდნავ მეტი იყო, ხოლო 2025 წლის ოქტომბრის მონაცემებით – 24%. ხუთი წლის წინ, 2020 წელს, პირველ 40 პოზიციაზე 16 რეპსიმღერა იყო წარმოდგენილი, ორი წლის წინ კი მხოლოდ – 8.
Drake ბოლო 15 წლის ყველაზე სტაბილური ჩარტების ვარსკვლავია. მას ჯერ არ გამოუშვია ალბომი Iceman, თუმცა რეგულარულად უშვებს სინგლებს ივლისის შემდეგ. Cardi B-იმ და BigXthaPlug-მა ასევე გამოსცეს ახალი ალბომები. Hot 100-ის ეს უიშვიათესი მომენტი კიდევ ერთხელ აჩვენებს, რომ რეპი კომერციულად უფრო სტაბილური პერიოდიდან ახალ ეტაპზე გადადის და ამავე დროს, კლასიკური და ახალი შემსრულებლების კონკურენცია ისევ უმთავრესი ფაქტორია ჩარტში თავის დამკვიდრების პროცესში.
