ბილი აილიშმა გასულ წელს სიმღერა – Birds of a Feather გამოუშვა და დღემდე ის ერთ-ერთ ყველაზე წარმატებულ ნამუშევრად მიიჩნევა მუსიკოსის კარიერაში. თუმცა ახალ ინტერვიუში აილიშმა აღნიშნა, რომ სიმღერის გამოშვება ლამის გადაიფიქრა, რადგან ეშინოდა, რომ ის „სულელური“ იქნებოდა.
Wall Street Journal-თან 29 ოქტომბერს გამოქვეყნებულ ინტერვიუში აილიშმა ისაუბრა იმაზე, როგორ დახარჯა თითქმის ერთი წელი სტუდიაში თავის ძმასთან და შემოქმედებით პარტნიორთან, ფინეასთან ერთად ტრეკზე მუშაობაში.
„სრულ ალბომსაც რომ ვუსმენდი, მაინც ვფიქრობდი: ხალხო, ეს რაღაც არ ვარგა,” – იხსენებს პოპვარსკვლავი.
საბედნიეროდ, Birds of a Feather საბოლოოდ შევიდა აილიშის მესამე სტუდიურ ალბომში – Hit Me Hard and Soft, რომელიც გასულ წელს მაისში გამოვიდა და Billboard 200-ის ჩარტში მეორე ადგილი დაიკავა. სამი კვირის განმავლობაში Billboard Global 200-ის პირველ ადგილზე იყო და 2024 წლის დასასრულს Spotify-ზე წლის ყველაზე ხშირად მოსმენილ სიმღერადაც იქცა. ამჟამად პლატფორმაზე სიმღერას უკვე 3 მილიარდზე მეტი სტრიმი აქვს.
Birds of a Feather აილიშის ტურნეს ბოლო მუსიკალური ნომერია. ტურის ფარგლებში, რომელიც 2024 წლის სექტემბერში დაიწყო, მომღერალს ბოლო რამდენიმე შოუ დარჩა. ტურნე ნოემბერში სან-ფრანცისკოში ორი შოუთი დასრულდება.
