GQ-სთვის მიცემულ ინტერვიუში, რომელიც 6 ნოემბერს გამოქვეყნდა, SZA-მ თქვა, რომ დრეიკის და კენდრიკ ლამარის დაპირისპირებაში ჩარევას არ აპირებს.
SZA-მ, რომელმაც ახლახან გამართა ერთობლივი ტური ლამართან, წარსულში დრეიკს ხვდებოდა და შემდეგ წლების განმავლობაში მასთან მეგობრობდა. SZA განმარტავს, რატომ გადაწყვიტა, არც ერთი მათგანისთვის არ დაეჭირა მხარი: „ეს იყო საქმე ორ ზრდასრულ კაცს შორის და რატომ ჩავერეოდი ამ დაპირისპირებაში?“ – უთხრა მან გამოცემას.
„რეალურად, ეს ჩემი საქმე არ იყო. რა თქმა უნდა, მე მიყვარს კენდრიკი. მე მის ლეიბლთან მაქვს კონტრაქტი და ეს ჩემი ოჯახია. დრეიკსაც უკვე დიდი ხანია, ვიცნობ და ძალიან კარგი ურთიერთობა გვაქვს. და, რა თქმა უნდა, ყოველთვის სამწუხაროა, როცა არასასიამოვნო რამ ხდება,“ – განმარტა SZA-მ.
მიუხედავად იმისა, რომ ის მთელი ამ დროის განმავლობაში დიპლომატიურად იქცეოდა, ფანებს მაინც აინტერესებდათ, რას ფიქრობდა SZA, როცა მისი ორი ახლობელი ადამიანი და შემოქმედებითი პარტნიორები ერთმანეთს დაუპირისპირდნენ.
დაძაბულობა წლების განმავლობაში იგრძნობოდა, მაგრამ 2024 წლის გაზაფხულზე კონფლიქტმა კრიტიკულ წერტილს მიაღწია, როცა ორივე მხარემ ერთმანეთზე დაწერილი ე.წ. დის-ტრეკების გამოქვეყნება დაიწყეს. მათ შორის არის ლამარის Not Like Us, რომელიც Billboard Hot 100-ის ჩარტის ლიდერია.
მიუხედავად იმისა, რომ მხარე არ აურჩევია, SZA შემოქმედებითად ყოველთვის არჩევანის წინაშე იყო. ერთი მხრივ, ის იყო კენდრიკის მთავარი სტუმარი 2025 წლის Super Bowl-ის შოუზე, სადაც რეპერმა Not Like Us-ის შესრულებისას დრეიკი პირდაპირ გააკრიტიკა. მეორე მხრივ კი, SZA ტურნეს ყოველ შოუზე ასრულებდა დრეიკთან ერთად ჩაწერილ დუეტს – Rich Baby Daddy. აღსანიშნავია ისიც, რომ ამ ტურს SZA ლამართან ერთად მართავდა.
ნეიტრალური და მშვიდობიანი პოზიციის შენარჩუნება უფრო რთული აღმოჩნდა მაშინ, როცა ნიკი მინაჟმა ზაფხულში X-ზე SZA-ს შესახებ მტრული, უხეში პოსტების გამოქვეყნება დაიწყო.
რამდენიმე პასუხის დაბრუნების შემდეგ SZA-მ მინაჟთან დიალოგი შეწყვიტა. GQ-სთან ინტერვიუში კი ნიკი მინაჟის შესახებ დასმულ კითხვაზე უპასუხა: „მე არ ვიცნობ მას. ჩვენ არავითარი კავშირი არ გვაქვს. არ არსებობს არანაირი ისტორია. არც რაიმე საერთო შინაარსი გვაკავშირებს. ცოტა უცნაური იყო,“ – განმარტა არტისტმა.
იხილეთ SZA ჟურნალ GQ-ის ყდაზე:
