2025 წლის დასაწყისიდან დღემდე Billboard 200-ის სათავეში 22 სხვადასხვა ალბომი მოხვდა. მათგან ორი: SZA-ს SOS (2022 წლის ალბომის დელუქს ვერსია) და კენდრიკ ლამარის GNX – წინა წლებშია გამოცემული.
შვიდმა ალბომმა პირველი ადგილი ერთ კვირაზე მეტხანს შეინარჩუნა, მათ შორისაა: ზემოხსენებული ორი ალბომი, Bad Bunny-ს Debí Tirar Más Fotos, Playboi Carti-ს Music, მორგან უოლენის I’m the Problem, Kpop Demon Hunters-ის Soundtrack და ტეილორ სვიფტის The Life of a Showgirl.
22 ნოემბრის მონაცემებით, ამ კატეგორიაში მორგან უოლენი და ტეილორ სვიფტი ლიდერობენ. მორგან უოლენის ალბომმა ჩარტში 12 კვირა დაჰყო, ტეილორ სვიფტის ალბომმა კი 6 კვირა გაატარა პირველ პოზიციაზე. Bad Bunny-ს ალბომი 4 კვირა იყო პირველ ადგილზე, Playboi Carti-ს და SZA-ს ალბომები 3 კვირა, ხოლო კენდრიკ ლამარისა და Kpop Demon Hunters-ის 2 კვირა ლიდერობდნენ.
2025 დასამახსოვრებელი წელი აღმოჩნდა: ტეილორ სვიფტის ალბომმა The Life of a Showgirl პირველივე კვირაში გაყიდვების რეკორდული შედეგი 4.002 მილიონი ერთეული აჩვენა, რითაც Adele-ის ალბომ 25-ის 2015 წლის მიღწევას გადააჭარბა (3.482 მილიონი).
ასევე აღსანიშნავია, რომ Billboard Hot 100-ში N1 ჰიტით ექვსი ალბომი გამოირჩევა: Lady Gaga-ს ალბომ Mayhem-ში შესული დუეტი ბრუნო მარსთან ერთად – Die With a Smile (5 კვირა), კენდრიკ ლამარისა და SZA-ს დუეტი Luther ალბომიდან GNX (13 კვირა), მორგან უოლენის ალბომ I’m the Problem-ში შესული სიმღერა What i Want ტეიტ მაკრეის მონაწილეობით (1 კვირა), საბრინა კარპენტერის სიმღერა Manchild ალბომიდან Man’s Best Friend (1 კვირა), Demon Hunters-ის სიმღერა Golden (8 კვირა) და ტეილორ სვიფტის ალბომ Showgirl-ში შესული სიმღერა The Fate of Ophelia (6 კვირა).
საინტერესოა, რომ Billboard 200-ის ჩარტში ორ შემსრულებელს ასევე აქვს Billboard Hot 100-ში N1 ჰიტები, თუმცა არა საკუთარ გამოცემებში. SZA-მ კენდრიკ ლამართან ერთად ჩაწერა Luther, ხოლო ტეიტ მაკრეიმ მონაწილეობა მიიღო მორგან უოლენის სიმღერაში What I Want. გარდა ამისა, ტრევის სკოტის ალბომმა, Jackboys 2-მ Billboard 200-ში პირველი ადგილი დაიკავა, ხოლო მისი სინგლი 4X4 თებერვალში Hot 100-ის სათავეში მოექცა, კენდრიკ ლამარის ჰიტი Not Like Us კი ერთი კვირის განმავლობაში იმყოფებოდა N1 პოზიციაზე.
