ლეგენდარულ მსახიობ სემუელ ელ ჯექსონს არ ჰქონია თანხმობის პრობლემა, როცა მას კენდრიკ ლამარის Super Bowl Halftime Show-ში მონაწილეობა შესთავაზეს. თუმცა მაშინ, როცა ის ფიქრობდა, რომ საუბარი მორიგ სამსახიობო გამოსვლას ეხებოდა, ჯიმი კიმელის შოუში სტუმრობისას მან გაამხილა, რომ წარმოდგენაც არ ჰქონდა, თუ „რევოლუციაზე” მისვლა მოუწევდა.
„კარგი დრო იყო. წარმოდგენაც არ მქონდა, რა ხდებოდა, როცა დამირეკეს და კენდრიკის შოუში მონაწილეობა მთხოვეს,” – გაიხსენა მსახიობმა. მისი თქმით, როცა შოუს პროდიუსერებმა უთხრეს, რომ ხელშეკრულებას გაუგზავნიდნენ, პროფესიონალმა ჯექსონმა უპასუხა, რომ ეს საკითხი არ ადარდებდა და დაჰპირდა, რომ როცა დასჭირდებოდათ, პირდაპირ მივიდოდა.
„როცა მივედი და რეპეტიციას გავდიოდით, ყველაფერი მშვენიერი და სახალისო იყო. ვუყურებდი მოცეკვავეებს, რომლებიც ვარჯიშობდნენ და ვფიქრობდი: ‘ალბათ დიდი ხანია, ამას აკეთებენ.’”
მსახიობის თქმით, წარმოდგენა არ ჰქონდა, რა უნდა მომხდარიყო, სანამ კოსტიუმირებული რეპეტიცია არ დაიწყო. „ეს იყო პირველი მომენტი, როცა გავიგე, რომ რევოლუციას ვაწყობდით,” – თქვა ჯექსონმა, რომელიც შოუში ბიძია სემს ასახიერებდა.
„ვიცოდი, რომ ბიძია სემი უნდა ვყოფილიყავი, თუმცა როცა რეპეტიცია დაიწყო და მე ჩემს როლს ვასრულებდი, ამ დროს შევტრიალდი და გავიფიქრე: ‘ერთი წუთით, ეს ხომ დროშაა… ისინი დროშას აკეთებენ,’” – იხსენებს ჯექსონი მოცეკვავეების წითელ, თეთრ და ლურჯ კოსტიუმებზე, რომლებითაც მათ ამერიკის დროშა გამოსახეს. „ეს რევოლუციურია,” – თქვა მან.
ჯექსონი, რომელსაც მანამდეც უთანამშრომლია რეპერებთან, მათ შორის LL Cool J-სა და ბასტა რაიმსთან, ასევე მონაწილეობს 1992 წლის კრიმინალურ დრამაში Juice თუფაქ შაკურთან ერთად. მსახიობი, რომელიც რეპერს მანამდეც შეხვედრია, თუფაქს დადებითად ახასიათებს, თუმცა იხსენებს ინციდენტს, რომელიც Juice-ის გადასაღებ მოედანზე მოხდა და რომელმაც შესაძლოა გააკვირვოს ფანები, ვისთვისაც ჯექსონის ბილწისტყვაობა ცნობილია.
გადაღების ერთ-ერთ ღამეს ჯექსონის მეუღლე, მსახიობი ლატანია ჯექსონი, ოთახში ფილმში მონაწილე მსახიობების დედებთან ერთად იჯდა. „ამ დროს ოთახში თუფაქი შემოვიდა და ვიღაცას აგინებდა, ყვიროდა,” – იხსენებს მსახიობი. მისი თქმით, ლატანია ჯექსონმა რეპერს ამის გამო უსაყვედურა: „ვერ ხედავ ამდენ ზრდასრულ ქალს? ასეთი ლექსიკის გამოყენება არ შეიძლება!” ჯექსონის თქმით, თუფაქმა ამის გამო ბოდიში მოიხადა. მსახიობმა რეპერს ჯენტლმენი უწოდა და აღნიშნა, რომ მას შემდეგ, როცა კი მუსიკოსი ლატანია ჯექსონს დაინახავდა, ზრდილობიანად მიეგებებოდა: „გამარჯობა, დედა, როგორ ხართ?”
კიმელი გაკვირვებული დარჩა იმ ფაქტით, რომ ჯექსონის მეუღლეს ბილწსიტყვაობაზე პრობლემა ჰქონდა, მსახიობის უხამსი ლექსიკის გათვალისწინებით, რაზეც ჯექსონმა დააზუსტა: „მხოლოდ ქალებით სავსე ოთახში.” კიმელმა კი დაუდასტურა, რომ სცენარში გაწერილი უხამსობა სავსებით ნორმალურია. „როცა შინ ვარ, ეს ჩემი სახლია და შემიძლია ის ვთქვა, რაც მინდა,” – დაამატა ჯექსონმა.
ნახეთ სემუელ ელ ჯექსონის ჯიმი კიმელის შოუში სტუმრობის ვიდეო:
