21 ნოემბერს ბრიტანელმა მომღერალმა ოლივია დინმა მკაცრად გააკრიტიკა Ticketmaster, Live Nation და AEG Presents – მისი 2026 წლის ჩრდილოამერიკული ტურნეს ბილეთების აბსურდულად მაღალი ფასების გამო.
არტისტის ტურნეს – The Art of Loving-ის ბილეთები გაყიდვაში ამავე დღეს ჩაეშვა და რამდენიმე წუთში სრულად გაიყიდა. თუმცა, გადაყიდვის პლატფორმებზე ბილეთების ფასი რიგ შემთხვევაში ათას დოლარს სცდებოდა, რასაც ოლივია დინის მკაცრი კრიტიკა მოჰყვა.
„@Ticketmaster @Livenation @AEGPresents – ამაზრზენ მომსახურებას სთავაზობთ მომხმარებელს. ბილეთის ფასები, რაც გადაყიდვის პლატფორმებზე ფიქსირდება, სრულიად ეწინააღდმეგება ჩვენს სურვილებს. ცოცხალი მუსიკა უნდა იყოს ყველასთვის ხელმისაწვდომი და უნდა ვიპოვოთ ახალი გზა. იყავით უკეთესები”. – დაწერა ოლივია დინმა ინსტაგრამ სთორიში.
Ticketmaster-მა მიიღო ეს გამოწვევა და ცდილობს, რეაგირებისთვის კონკრეტული ნაბიჯები გადადგას. კომპანიის განცხადებით, ტურნეს ბილეთების ფასებს ზღვარს დაუწესებს, გულშემტკივრებს კი იმ ზედმეტ თანხას დაუბრუნებს, რომელიც მათ Ticketmaster-ის გადამყიდველებისგან ბილეთებისთვის გადაიხადეს. Live Nation-ისა და Ticketmaster-ის ერთობლივი განცხადებით, კომპანიამ გაააქტიურა სერვისი, რომელიც საიტზე ბილეთების თავდაპირველი ფასით გაყიდვას დაარეგულირებს და ტრანზაქციას საკომისიოს გარეშე უზრუნველყოფს.
კომპანიის თქმით, იმ მომხმარებლისთვის, ვინც ბილეთები ფასნამატით შეიძინა, თანხის დაბრუნება 10 დეკემბრამდე დასრულდება, თუმცა შესაძლოა, შუამავალი ბანკების მეშვეობით აღნიშნული თანხის გადარიცხვა რამდენიმე დღით დაგვიანდეს.
„ვიზიარებთ ოლივიას სურვილს – ცოცხალი მუსიკა იყოს ყველასთვის ხელმისაწვდომი და მსმენელებს ჰქონდეთ შესაძლებლობა, ხელმისაწვდომ ფასში შეიძინონ ბილეთები. მიუხედავად იმისა, რომ ჩვენ არ შეგვიძლია მოვთხოვოთ სხვა სავაჭრო პლატფორმებს, შეასრულონ არტისტის სურვილი გადაყიდვის პოლიტიკასთან დაკავშირებით, ვიზიარებთ ოლივიას მოწოდებას – „ვიყოთ უკეთესები” და გადავდგით ნაბიჯები მაგალითისთვის. ვიმედოვნებთ, რომ მსგავსი ძალისხმევა გულშემატკივრებს დაეხმარება, კიდევ ერთ შოუს დაესწრონ და აღმოაჩინონ ახალი არტისტი.” – აღნიშნავს მაიკლ რაპინო, Live Nation Entertainment-ის აღმასრულებელი დირექტორი.
Ticketmaster-ის განცხადებით, ტურნეზე მოთხოვნა იმდენად დიდი იყო, რომ ოლივია დინმა Madison Square Garden-ში კიდევ სამი კონცერტი დაამატა.
ოლივია დინი ცოტა ხნის წინ საბრინა კარპენტერთან ერთად აშშ-ის ტურნეს ბოლო ნაწილში მონაწილეობდა, ნოემბერში კი არტისტმა ჩრდილოეთ ამერიკის სოლო ტურნე დააანონსა. ლონდონელი არტისტის პოპულარობა განსაკუთრებით 15 ნოემბერს, Saturday Night Live-ის დებიუტის შემდეგ გაიზარდა, რასაც ავსტრალიაში, სიდნეიში, ღია ცის ქვეშ ჩატარებული შოუ მოჰყვა, არტისტი ასევე წარდგა 2025 წლის ARIA Awards-ზე.
აღანიშნავია, რომ ავსტრალიაში ვიზიტის შემდეგ მისი სიმღერა Man I Need ავსტრალიური ARIA ჩარტის პირველ ადგილზე მოხვდა. ოლივიას ოთხი სიმღერა Billboard Hot 100-შია, მათ შორის Man I Need – მე-5 პოზიციაზე. მისი მეორე ალბომი The Art of Loving 22 ნოემბრის Billboard 200-ს მიხედვით მე-5 ადგილს იკავებს. ოქტომბერში დიდ ბრიტანეთში ალბომი პირველ ადგილზე გავიდა და იმავე კვირაში Man I Need სინგლების ჩარტის სათავეში მოექცა.
ოლივია დინის 2026 წლის ტურნე დიდ ბრიტანეთსა და ევროპაში აპრილში, შოტლანდიის დედაქალაქ გლაზგოდან დაიწყება და 20 ივნისს დუბლინში დასრულდება. მისი ამერიკული ტურნე კი 10 ივლისს სან-ფრანცისკოში დაიწყება, შემდეგ ლოს-ანჯელესში, ნიუ-იორკში, ატლანტაში, ტორონტოში, ლას-ვეგასში, ბოსტონსა და ჰიუსტონში გაგრძელდება და 28 აგვისტოს ოსტინში დასრულდება.
