Together For Palestine-ის გუნდმა, რომელმაც პალესტინის მხარდასაჭერად სექტემბერში 2 მილიონი ფუნტი შეაგროვა, ამჯერად ახალი საქველმოქმედო საშობაო სინგლის გამოცემა დააანონსა.
ბრაიან ინო, სელესტე, ნენე ჩერი, მეიბლი და დენ სმითი იმ მუსიკოსებს შორის არიან, ვინც მონაწილეობს სიმღერაში, რომელიც 12 დეკემბერს გამოვა – დღეს, როცა დიდი ბრიტანეთის საშობაო No.1 სიმღერის რბოლა ოფიციალურად აიღებს სტარტს.
სინგლში ბრიტანელი და პალესტინელი მუსიკოსები გაერთიანდებიან და მსმენელს ტრადიციული პალესტინური იავნანის, Yamma Mweel El Hawa-ს განახლებულ ვერსიას წარუდგენენ. შემოსული თანხა Together For Palestine-ის ფონდში გადაირიცხება და სრულად მოხმარდება ომში დაზარალებულ მოსახლეობას.
პალესტინელმა მუსიკოსმა ნაი ბარგუტიმ განცხადებაში აღნიშნა: „ეს იავნანა, ჩვენი პალესტინური მუსიკალური მემკვიდრეობიდან, ადრეული ბავშვობიდან სულ ჩემთან იყო. დღეს კი ის ძალიან საჭირო დროს ბრუნდება, როგორც შეხსენება იმისა, რასაც პალესტინელები არასდროს დაკარგავენ: იმედი, წინააღმდეგობა, სილამაზე და ღირსება.”
ბრაიან ინომ დაამატა: „გვინდა, რომ წარმოუდგენელი დანაკარგის, მწუხარებისა და უსამართლობის წელი დავასრულოთ სიყვარულის აქტით პალესტინელი ბავშვების მიმართ. სიმღერა ასახავს მათ სილამაზეს, მათ სურვილებსა და იმედს. თუ დავირაზმებით და ყველა ჩამოვტვირთავთ მას, რეალური შანსი გვაქვს, საშობაო ლიდერი სიმღერა გავხდეთ, რაც სასიცოცხლოდ მნიშვნელოვანი მხარდაჭერა იქნება ღაზას ოჯახებისთვის.”
მეიბელმა კი განაგრძო: „ამ სიმღერას ჩემთვის განსაკუთრებული ადგილი უჭირავს ბევრი მიზეზის გამო, პირველ რიგში, იმიტომ, რომ ეს არის პირველი შემთხვევა, როცა დედასთან და დასთან ერთად ვიმღერე (ნენე ჩერი და ტაისონი). ხოლო ის ფაქტი, რომ ეს იქნება ტრადიციული იავნანა მიძღვნილი ღაზას დედებისა და ბავშვებისადმი, ჩემთვის ყველაფერს ნიშნავს. იმედი მაქვს, ჩვენს ხმებში იგრძნობთ ძალას.”
