კიმ კარდაშიანი ცრემლებით იხსენებს იმ მომენტს, როცა კანიე უესტმა ის 2016 წლის ძარცვის სკანდალური სცენის გაყალბებაში დაადანაშაულა.
„კარდაშიანების” ბოლო ეპიზოდი, რომელიც ხუთშაბათს გამოვიდა, სწორედ ძარცვის საქმეს ეხება. კიმი სასამართლოზე დასასწრებად პარიზში ბრუნდება და ინციდენტს იხსენებს.
კარდაშიანს კანიეს სახელი არ უხსენებია, თუმცა აღნიშნა, რომ საუბარი ყოფილ მეუღლეს ეხებოდა.
„ჩემმა ყოფილმა მეუღლემ მითხრა: ‘შენ ეს ძარცვა სატელევიზიო შოუსთვის დადგი’ და მან ეს სხვების თანდასწრებით გააკეთა,” – ამბობს კიმი თვალცრემლიანი. „ეს გულში დანის ჩარტყმის ტოლფასი იყო. ის, რომ ვიღაცას შენი არ სჯერა – მას, ვინც ასე ახლოსაა შენთან, ვინც უნდა გიცნობდეს და იცოდეს, თუ რამდენად იმოქმედა ამან შენს ცხოვრებაზე – ეს ფაქტი ძალიან მაწუხებდა. უნდა მიცნობდე, ვინ ვარ.”
ძარცვა 2016 წელს პარიზში მოხდა. პარალელურად, კანიე ნიუ-იორკში კონცერტს მართავდა, რომელიც „სასწრაფო ოჯახური პრობლემის” გამო მაშინვე შეწყვიტა, როცა კიმის ამბავი გაიგო.
ძარცვის შედეგად დამნაშავეებმა 10 მილიონი დოლარის ღირებულების სამკაულები წაიღეს, თავად კარდაშიანი კი სააბაზანოში დააბეს და იარაღით ემუქრებოდნენ. „როცა საბოლოოდ შევძელი სასამართოზე მისვლა, ამ ადამიანების თვალებში ჩახედვა და მათი ბოდიშების მოსმენა, ვიფიქრე: ‘ხომ ხედავთ, ეს სიმართლეა.’ ბედნიერი ვარ, რომ ყველაფერი დასრულდა,” – დაამატა მან.
ინციდენტიდან 9 წლის შემდეგ ათიდან რვა ადამიანი (შვიდი მამაკაცი და ერთი ქალი) მაისში დამნაშავედ ცნეს. მათ სამიდან რვა წლამდე პატიმრობა მიესაჯათ. დანარჩენ ორ პირს კი ბრალდება მოეხსნა.
