2026 წლის ევროვიზიის სიმღერის კონკურსი 16 მაისს ავსტრიის დედაქალაქ ვენაში გაიმართება.
4 დეკემბერს ევროპის მაუწყებელთა კავშირმა (EBU), მიუხედავად რამდენიმე საერთაშორისო მაუწყებლის მოწოდებისა, რომ ისრაელი 2026 წლის კონკურსიდან მოიხსნას, მიიღო გადაწყვეტილება, რომ ქვეყანა მაინც მიიღებს მონაწილეობას. „EBU-ს ყველა წევრი, ვისაც სურს, მონაწილეობა მიიღოს 2026 წლის ევროვიზიის სიმღერის კონკურსში და ეთანხმება ახალი წესების დაცვას, უფლებამოსილია, ჩაერთოს კონკურსში“. საპასუხოდ, ნიდერლანდებმა, ესპანეთმა, ირლანდიამ და სლოვენიამ განაცხადეს, რომ ისინი უარს ამბობენ ყოველწლიურ კონკურსში მონაწილეობაზე. მოსალოდნელია, რომ ისლანდიაც ასევე მოიქცევა.
ნიდერლანდების მაუწყებელმა Avrotros-მა თქვა, რომ არსებული გარემოებების გათვალისწინებით, ევროვიზიის კონკურსში მონაწილეობა შეუთავსებელია მათ არსებით საჯარო ღირებულებებთან. ესპანურმა მაუწყებელმა RTVE-მ კი დაამატა: „RTVE-ს დირექტორთა საბჭო გასულ სექტემბერში შეთანხმდა, რომ ესპანეთი გამოეთიშებოდა ევროვიზიას, თუ მასში ისრაელი მიიღებდა მონაწილეობას. ეს გამოსვლა ასევე ნიშნავს, რომ RTVE არ გადასცემს ევროვიზია 2026-ის ფინალს და არც წინასწარ ნახევარფინალებს“.
ეს არ არის პირველი შემთხვევა, როდესაც გლობალურმა პოლიტიკამ გავლენა მოახდინა ევროვიზიის სიმღერის კონკურსზე, რომელიც 1956 წელს დაარსდა. წინა კონფლიქტები ეხებოდა სომხეთ-აზერბაიჯანის; რუსეთ-უკრაინისა და საქართველო-რუსეთის ურთიერთობებს.
პროექტის ორგანიზატორები ყურადღებას ამახვილებენ, რომ ევროვიზიის კონკურსის ერთ-ერთი გაცხადებული მიზანი ღონისძიების არაპოლიტიკური ხასიათია.
