Billboard
10 დეკემბერი, 2025
სიმღერა ხევსურეთსა და მის მითოლოგიას ეძღვნება.
საქართველოში მცხოვრები ბრიტანელი მუსიკოსი ნიკ ჰადსონი ახალ სინგლს გამოსცემს. სიმღერა, სახელწოდებით Mountains Are My Church, ხევსურეთსა და მის მითოლოგიას ეძღვნება. მასში მოხსენიებულია ანატორი, ხევსური რაინდები და აბუდელაურის დევი. კომპოზიციას ახლავს ვიდეოკლიპიც, რომელიც სვანეთსა და ხევსურეთშია გადაღებული.
Mountains Are My Church შესულია ჰადსონის ალბომში On The Eve Of Hope, რომელიც მუსიკოსმა 2025 წლის სექტემბერში გამოსცა.
„ამ სიმღერის იდეა მშრალ ხიდზე მომივიდა. იქიდან კარგად ჩანს პეიზაჟი, რომელიც, როგორც ვიცი, ასახავს ხვეულ გზას ხევსურეთისკენ, რომელსაც მე ჩემს სულიერ სახლად მივიჩნევ,” – ამბობს მუსიკოსი. „თავად ვიკვლევ ქართულ წარმართობას და სულ მინდოდა, შემექმნა ჰიმნი საქართველოსთვის იმ ისტორიული შემთხვევების გამოძახილით, როცა ამ წარმართულმა ელემენტებმა ჩვენს თანამედროვე სამყაროში შემოაღწია – იმ იმედით, რომ ეს კვლავაც მოხდება და ისინი შეეწინააღმდეგებიან უფრო დამანგრეველ ენერგიებს, რომლებიც დღევანდელ სამყაროში დომინირებენ.”
ეს არ არის პირველი შემთხვევა, როცა ჰადსონი თავის შემოქმედებას საქართველოსა და, კონკრეტულად, ხევსურეთს უძღვნის. გასულ წელს მან გამოსცა სიმღერა სახელწოდებით „ხევსურეთი”, ასევე ალბომი Kanda Teenage Honey, რომელიც სწორედ საქართველოს ლანდშაფტების შთაგონებით შეიქმნა.
