10 დეკემბერს Variety-მ გაავრცელა ინფორმაცია, რომ კორტნი ლავის ცხოვრებისა და კულტურული გავლენის შესახებ მაყურებელი იხილავს დოკუმენტურ ფილმს, სახელწოდებით Antiheroine. ფილმს ედუარდ ლავლეისი და ჯეიმს ჰოლი გადაიღებენ. მისი ჩვენება „სანდენსის“ კინოფესტივალზე შედგება. ფესტივალი 2026 წლის 22 იანვრიდან 1-ელი თებერვლის ჩათვლით გაიმართება.
„მომღერალს, სიმღერების ავტორსა და მსახიობს, კორტნი ლავს დიდი ხანია, გავლენა აქვს როკსა და პოპ-კულტურაზე,” – ნათქვამია ფილმის აღწერაში. „ათწლეულზე მეტი ხნის შემდეგ, ის პირველად აპირებს ახალი მუსიკის გამოშვებას და მზადაა, საკუთარი ამბავი გაუფილტრავად და ბოდიშის მოხდის გარეშე გადმოსცეს“.
გამოცემის ცნობით, ფილმზე მუშაობა უკვე დაწყებულია და მასში ლავი ლონდონში, საკუთარ სახლშია გადაღებული, სადაც ის რამდენიმე წლის წინ გადავიდა საცხოვრებლად.
„კორტნი დიდხანს ელოდა საკუთარი ისტორიის თავისივე სიტყვებით მოყოლას“, – აღნიშნავს პროდიუსერი ჯულია ნოტინგემი, რომელსაც ასევე გადაღებული აქვს Pamela, a Love Story – ფილმი პამელა ანდერსონის შესახებ. „როგორც 90-იანი წლების შვილს, ყოველთვის მაინტერესებდა კორტნი – ქალი, რომელსაც ხშირად განსაზღვრავდა მისი ქმარი, კურტ კობეინი. ეს ფილმი იმიტომ შევქმენით, რომ კორტნის ისტორია გაცილებით მეტია, ვიდრე მხოლოდ სათაურები. ის რთული და ღრმად ადამიანურია“ – თქვა ნოტინგემმა.
კორტნი ლავი Nirvana-ს ფრონტმენზე ორი წლის განმავლობაში იყო დაქორწინებული და მათ საერთო ქალიშვილი, ფრენსის ბინი შეეძინათ.
პერსონალური ცხოვრების მიღმა, რომელიც ასევე ნარკოტიკების მოხმარების გახმაურებულ პრობლემებთან იყო დაკავშირებული, ლავი 90-იანი წლების გრანჟ სცენაზე გავლენიანი ფიგურა იყო. მან 1989 წელს შექმნა ჯგუფი Hole. ბენდმა ოთხი სტუდიური ალბომი გამოუშვა, რომელთაგან ყველა Billboard 200-ის ჩარტში მოხვდა, Billboard Hot 100-ის ჩარტში კი მათი სამი ჰიტი შევიდა: Doll Parts, Celebrity Skin და Malibu.
ლავი ასევე ცნობილია სოლო შემსრულებლის და მსახიობის სტატუსით. მისი ცნობილი ფილმებია: The People vs. Larry Flynt, Man on the Moon და Trapped.
