Irakli Gabriel-ისა და Anana Kaye-ს ერთობლივი პროექტი ინდი-ალტ დუო Anana Kaye უკვე წლებია, ამერიკაში მოღვაწეობს. Anana Kaye-მ ცოტა ხნის წინ ახალი სინგლი Cordelia გამოაქვეყნა. სიმღერა ნეშვილში, Forty-One Fifteen სტუდიოში ჩაიწერა. ათი კომპოზიციისგან შემდგარი სრული ალბომი კი 2026 წლის მარტში გამოვა.
სინგლის “ართვორკი” თბილისში ფოტოგრაფმა გიორგი ყოლბაიამ გადაიღო. კოსტიუმი კი, რომელიც ქართულ ტრადიციულ მოტივებზეა შექმნილი, ქართველ მხატვარსა და სცენოგრაფს, ანა დვალს ეკუთვნის.
ანანა: „ბავშვობიდან ძალიან მიყვარდა ტრაგედიების კითხვა. „ოიდიპოს მეფე“ და „მეფე ლირი“ ჩემი უსაყვარლესი ნაწარმოებები იყო. მაშინ ჯამბაზის პერსონაჟთან განსაკუთრებული კავშირი მქონდა, ახლა კი ეს ოდნავ შეიცვალა. ალბათ ამიტომაცაა ეს ტრაგედია ასეთი მარადიული, – ცხოვრების სხვადასხვა ეტაპზე სულ სხვა თვალით უყურებ.
დღეს, საითაც არ ვიყურებით, ყველგან კრიზისს ვხედავთ. ძველი სტრუქტურები, პოლიტიკური თუ ცხოვრებისეული, ჩვენს თვალწინ ინგრევა. გადატვირთული ვართ ინფორმაციით, რასაც ცოდნად ვთვლით. ჩვენი ადამიანობის ყველაზე ფუნდამენტური ასპექტებიც კი კითხვის ნიშნის ქვეშ დგება ხელოვნური ინტელექტის ეპოქაში. მილიონობით ადამიანი იტანჯება ომით, სიღარიბით, შიმშილით, და ამ ყველაფერს, ჩვენ ვხედავთ თუ არა, განკარგავს ალგორითმი. შეიძლება ჩვენს ცხვირ-წინ ხდებოდეს ადამიანური ტრაგედია და არც არავინ დაიჯეროს, იმიტომ რომ ყველა თავის ინფორმაციულ მატრიცაში ცხოვრობს. საერთო რეალობა თითქმის აღარ გაგვაჩნია. ასეთ დროს, ტრაგედია ჭკუიდან გადასულ მეფესა და მის ქალიშვილზე, რომელიც ერთადერთია, ვინც სიმართლის თქმას ბედავს და ზუსტად ამის გამო ისჯება, მე პირადად მეხმარება, გარშემო სამყარო სხვანაირად დავინახო, რომ მეც არ შევიშალო ჭკუიდან.“
ირაკლი: „ანანამ და მე ეს სიმღერა აკუსტიკურად დავწერეთ დევიდ ოლნისთან (David Olney) ერთად, მის გარდაცვალებამდე ცოტა ხნით ადრე. მაშინ ვფიქრობდით, რომ ეს სიმღერა ჩვენს მომავალ პროექტში შევიდოდა და შეიძლება, დუეტიც კი ყოფილიყო, როგორც რამდენიმე სიმღერა Whispers and Sighs ალბომზე. სიმღერა მინორული აკორდებით და საკმაოდ მძიმე ლირიკული თემებითაა გაჟღენთილი, ასე რომ, ჩვენ გვინდოდა, ეს სიმძიმე კონტრასტულად გაგვეჭრა საცეკვაო ბითით და ორიგინალური არანჟირებით. მახსოვს, ჩვენმა პროდიუსერმა ჩარლი ჩემბერლენმა (Charlie Chamberlain) მისამღერში ის ფანკ-გიტარის ნაწილი რომ ჩაწერა, თავიდან თითქოს სრულიად მოულოდნელი იყო, მაგრამ აშკარად სწორი იმპულსი აღმოჩნდა. იმ პერიოდში, როდესაც ალბომს ვქმინიდთ ხშირად ვუსმენდით David Bowie-ის Earthling-ს. შემდეგ კი მარკ პლატიმ (Mark Plati), რომელიც ბოუისთან ერთად Earthling-ის პროდიუსერი იყო, Cordelia დამიქსა, რაც, ჩვენი აზრით, ძალიან შესაფერისი იყო. ბასისტი Tim Lefevbre-იც ბოუის კოლაბორატორია და მის ბოლო ალბომზე, Blackstar-ზე აქვს დაკრული.“
ახალი სინგლი Cordelia დუეტის შემოქმედებაში კიდევ ერთი მნიშვნელოვანი თავია. მოისმინეთ სიმღერა, რომელიც კლასიკურ ლიტერატურას, თანამედროვე სოციალურ ტრავმასა და უნიკალურ მუსიკალურ ხედვას აერთიანებს.
