Vinda Folio-მ (თემო ეზუგბაია) ახალი მუსიკალური ნამუშევარი გამოაქვეყნა, სახელწოდებით Si So Req / სი სო რექ. ეს არტისტის პირველი სიმღერაა, რომელიც მეგრულ ენაზეა შესრულებული. კომპოზიციის ტექსტი მეგრული პოეზიისა და ქართული კლასიკის სინთეზია, სადაც ზაალ ჯალაღონიას (მეგრელი პოეტი) ლექსების მიქსი და გალაკტიონ ტაბიძის ლექსიდან „ქარი ქრის“ ფრაგმენტებია გაერთიანებული.
Vinda Folio – მუსიკოსი:
„ამ სიმღერის შექმნის იდეა ასე კონკრეტულად როდის გაჩნდა, არ მახსოვს, იმიტომ, რომ მეგრულად მუსიკის გაკეთება ქვეცნობიერად სულ სულ მაინტერესებდა. მერე ისე მოხდა, რომ ეგნატე შამუგიამ შარშან ზაალ ჯალაღონიას, მეგრელი პოეტის წიგნი მაჩუქა და როცა მისი ლექსები წავიკითხე, ძალიან მომეწონა, მუსიკალური მომეჩვენა. ამის მიხედვით ავაწყვე სიმღერა, რომელიც, მისი ლექსების მიქსისა და გალაკტიონ ტაბიძის რამდენიმე ფრაზისგან შედგება ლექსიდან – „ქარი ქრის.”
კომპოზიცია ეგზისტენციალური ხასიათისაა, ის საკუთარ თავთან გაუცხოებასა და იდენტობის ძიებაზე გვიყვება:
„სიმღერა ცოტა დაკარგულობაზეა, სადაც საკუთარ თავს ეძებ, როცა დიდ სამყაროში პატარა ჩანხარ. დაახლოებით ასეთი შეგრძნება და სიტუაციაა აღწერილი. ერთი სიტყვით, ეგზისტენციალური თემატიკაა.
მუშაობის პროცესს რაც შეეხება, რეალურად, როცა ეგნატემ წიგნი მაჩუქა, ორ კვირაში სიმღერის დემო ვერსია მზად მქონდა და ეს სადღაც ორ-სამ თვეში, ჩემი დროის აღქმით, საკმაოდ მალე იყო, თუ იმას გავითვალისწინებთ, რომ ჩემი ზოგიერთი სიმღერის გამოსვლას სამი წელი დასჭირდა.”
