19 იანვარს პოდკასტის – 7PM in Brooklyn-ის ახალი ეპიზოდი გამოქვეყნდა, რომლის სტუმარიც მერი ჯეი ბლაიჯი იყო. მან იმ კოლაბორაციაზე ისაუბრა, რომელიც Jay Z-სთან ერთად ჩაწერა, თუმცა ოფიციალურად არ გამოუცია. მიზეზი კი ის იყო, რომ ტრეკი არტისტების ნების საწინააღმდეგოდ, პირატულად გავრცელდა.
„რამდენიმე დღის წინ ერთ ჩანაწერს ვუსმენდი. ის Jay Z-სთან ერთად არის ჩაწერილი და თან ნამდვილი მონსტრია! ახალგაზრდობაში ამ ტრეკის ჩაწერისას საოცრად მოტივირებული ვიყავით. არ დავასახელებ, ვინ იყო, მაგრამ ვიღაცამ გაავრცელა.”
თუმცა ბლაიჯი არ გამორიცხავს, რომ წლების შემდეგ, თაროზე შემოდებული კოლაბორაცია მაინც გამოქვეყნდეს.
მიუხედავად იმისა, რომ იმ პერიოდში მერი ჯეი ბლაიჯმა და Jay Z-იმ ერთად მუშაობა ვერ გააგრძელეს, მოგვიანებით Reasonable Doubt-ის ტრეკის – Can’t Knock the Hustle-ისთვის გაერთიანდნენ, ასევე ითანამშრომლეს ბლაიჯის 2005 წლის ალბომის – The Breakthrough-ის ფარგლებში.
მერი ჯეი ბლაიჯი და Jay Z 2008 წელს Heart of the City Tour-ზე გაემგზავრნენ. ტურნემ ჩრდილოეთ ამერიკის დიდი სტადიონები და საკონცერტო სივრცეები მოიცვა, სამი კონცერტი გაიმართა ნიუ-იორკის Madison Square Garden-შიც.
ბლაიჯი ამ წელს ლას ვეგასში გამართავს შოუებს. Mary J. Blige: My Life, My Story – The Las Vegas Residency – ასე ჰქვია პროექტს და ჯამში 10 შოუს მოიცავს. პირველი კონცერტი 1-ელ მაისს გაიმართება. შოუების სერია ივლისამდე გაგრძელდება.
ნახეთ მერი ჯეი ბლაიჯის ინტერვიუ:
