2026 წლის მილანი-კორტინას ზამთრის ოლიმპიურ თამაშებზე ქართულმა სიმღერამ გაიჟღერა. 10 თებერვალს ფიგურულ ციგურაობაში ევროპის ჩემპიონმა ნიკა ეგაძემ ინდივიდუალურ შეჯიბრებაში მოკლე პროგრამა წარადგინა. სპორტსმენის გამოსვლას კი ფონად „მგზავრების” 2022 წლის სიმღერა „ვალსი” გასდევდა.
„ვალსი” შესულია ჯგუფის 2023 წლის ალბომში „კამარა”. მისი ვიდეოკლიპი კი, რომელსაც მოკლემეტრაჟიანი ფილმის სახე აქვს, შემოქმედებითი ინდუსტრიების გლობალური დაჯილდოების, Awards EMEA 2023-ის ნომინანტი გახდა. მას კონკურენციას უწევდნენ ისეთი არტისტების ნამუშევრები, როგორებიც არიან ტრევის სკოტი, Daft Punk, The Rolling Stones და სხვები. კლიპის რეჟისორი ლადო კვატანიაა.
„მგზავრების” სიმღერაზე შესრულებული მოკლე პროგრამით ქართველმა მოციგურავემ 85.11 ქულა დაიმსახურა, რითაც ფინალში გამოსვლის უფლება მოიპოვა. ამავე წლის იანვარში ნიკა ეგაძე ქვეყნის ისტორიაში ვაჟთა შორის პირველი ევროპის ჩემპიონი გახდა. ევროპის ჩემპიონის ტიტული მოიპოვა ასევე ანასტასია მეტელკინასა და ლუკა ბერულავას წყვილმა.
2026 წლის ზამთრის ოლიმპიადაზე საქართველოს ნაკრები ორ სახეობაში რვა სპორტსმენით არის წარმოდგენილი, მათ შორის რვა – ფიგურულ ციგურაობაში, ორი კი სამთო-სათხილამურო სპორტში ასპარეზობს.
ნახეთ ნიკა ეგაძის გამოსვლა:
