ოლიმპიური ჩემპიონი ციგურაობაში ალისა ლიუ ენდი კოენს შეუერთდა გადაცემაში Watch What Happens Live. სპორსტმენმა ზამთრის ოლიმპიადაზე ისაუბრა, მისი პროგრამების მუსიკალური არჩევანი განმარტა და ის სიმღერები დაასახელა, რომლებზეც მომავალში სურს ყინულზე გამოსვლა. ლიუმ კოენს უამბო, თუ საიდან მოვიდა გადაწყვეტილება, თავისუფალი პროგრამის ნომერი დონა სამერის MacArthur Park-ზე შეესრულებინა.
„ვიღაცამ მირჩია, რომ ამ სიმღერისთვის მომესმინა. შემდეგ კი 16-წუთიანი ვერსია ვიპოვე და ეს უკვე სულ ახალი საფეხური იყო.”
მართლაც, დონა სამერის სიმღერაზე შესრულებულმა თავისუფალმა პროგრამამ ლიუს მესამე ადგილიდან პირდაპირ ოქროს მედალი მოუტანა. გარდა საკუთარი გამარჯვებისა, სპორტსმენის წყალობით, სიმღერა „ბილბორდის” საცეკვაო ციფრული სიმღერების გაყიდვების ჩარტის ლიდერი გახდა.
MacArthur Park არ არის ერთადერთი სიმღერა, რომელსაც ლიუმ ჩარტებში წარმატება მოუტანა. PinkPantheress-ისა და ზარა ლარსონის Stateside-მა სტრიმებში 88%-იანი ზრდა განიცადა მას შემდეგ, რაც ლიუმ სიმღერა დახურვის ცერემონიის გალაკონცერტზე გამოიყენა. ლეივეის Promise-მა კი ოთხ დღეში 1.3 მილიონი სტრიმი დააგროვა მას შემდეგ, რაც ლიუმ მასზე მოკლე პროგრამა შეასრულა.
კოენთან საუბარში მოციგურავემ თავისი ხუთი საყვარელი სიმღერაც გააზიარა, რომლებზეც სამომავლოდ ყინულზე გამოსვლას ისრუვებდა. ესენია: Escape From New York-ის Fire in My Heart, ბილი აილიშის Chihiro, ჩაიკოვსკის „გედების ტბა”, Mitski-ს Star და ტოპ ხუთეულის ლიდერი – კვლავ PinkPantheress, სიმღერით Capable of Love.
ლიუ ციგურაობაში წელს დაბრუნდა მას შემდეგ, რაც 2022 წელს, 16 წლის ასაკში მას თავი დაანება. დაბრუნებამდე კი მწვრთნელს იმ პირობების სია გადასცა, რომელიც მისი დაბრუნებისთვის იყო საჭირო. ერთ-ერთი მათგანი სწორედ მუსიკის დამოუკიდებლად შერჩევის შესაძლებლობა იყო. ასე რომ, სიურპრიზი არ იქნება, თუ 2030 წლის ზამთრის ოლიმპიურ თამაშებზე PinkPantheress-ის მორიგ სიმღერას მოვისმენთ.
