სალომე ესაძემ მსმენელს ახალი ნამუშევარი – Chaser წარუდგინა. სიმღერის ტექსტი მელანქოლიურ განწყობას ქმნის და რამდენიმე პირად ისტორიას აერთიანებს, თუმცა მუსიკა უფრო ენერგიული და დინამიკურია. Chaser დრამატურგიული განვითარებით ხასიათდება – ის მშვიდი შესავლით იწყება, შემდეგ კი ეტაპობრივად უფრო ინტენსიური ხდება. ეს არის მონაკვეთი, სადაც არტისტი მსმენელს საკუთარ იატორიას უყვება.
ახალი რელიზის შესახებ სალომე ესაძე Billboard Georgia-ს ესაუბრა. როგორც არტისტი აღნიშნავს, ტრეკზე მუშაობა იმ პერიოდში დაიწყო, როცა დაგროვილი ემოციების მუსიკაში გადატანა სურდა. ტექსტის გარდა, სიმღერაში ისმის მცირე მონოლოგიც, რომელიც ერთგვარი შეხსენებაა იმისა, თუ რამდენად მნიშვნელოვანია აწმყოზე, კონკრეტულ მომენტზე ფოკუსირება.
სალომე ესაძის თქმით, Chaser-ზე მუშაობის პროცესმა არაერთი საინტერესო მუსიკოსი გააერთიანა და ამ პროცესში ბევრი ახალი იდეაც გაჩნდა:
„მათი ჩართულობა და მხარდაჭერა ჩემთვის დიდი მოტივაცია იყო. ტრეკში ჩემი მეგობრების ხმები და სიცილიც ისმის, რაც სიმღერის ჩაწერის პროცესის ბუნებრივი ნაწილი გახდა. მთლიანობაში, ძალიან სახალისო და შემოქმედებითი გარემო იყო, რაც საბოლოოდ ტრეკის ენერგიაზეც აისახა. სამუშაო პროცესში ჩემთან ერთად იყო ჩემი უახლოესი მეგობარი და შესანიშნავი მუსიკოსი ერეკლე გუჯეჯიანი, რომელსაც ხშირად ახსნის გარეშეც ესმის ჩემი იდეები. ბასის პარტიაზე ლუკა კასრელიშვილმა იმუშავა, მოგვიანებით კი პროექტს ნინა კასრელიშვილიც შემოუერთდა – ნიჭიერი მუსიკოსი, რომლის იდეებმაც ტრეკს ახალი სიცოცხლე შესძინა.”
მუსიკის მასტერინგი გიორგი ქორიძეს ეკუთვნის, ხოლო ქავერ-არტისა და ვიზუალური კონცეფციის ავტორი ჯაბა ქურთიშვილია. სინგლის გარეკანის გრაფიკულ ნაწილზე ასევე იმუშავა ვიზუალურმა არტისტმა Nuzi-მ.
„განსაკუთრებული მადლობა მინდა გადავუხადო ჩემს მეგობრებს, რომ ამ პერიოდის განმავლობაში მუდამ მამხნევებდნენ და მაძლევდნენ მოტივაციას, ბოლომდე მიმეყვანა ყველაფერი,” – ამბობს სალომე ესაძე.
