გამოქვეყნდა ჯასტინ ტიმბერლეიკის დაკავების კადრები, როცა პოლიციამ ის 2024 წელს სატრანსპორტო საშუალების ნასვამ მდგომარეობაში მართვისთვის გააჩერა.
20 მარტს სეგ ჰარბორის პოლიციამ დამუშავებული ვიდეომასალა გადასცა იმ მედიასაშუალებებს, რომლებმაც საჯარო ინფორმაციაზე მოთხოვნა დააფიქსირეს. 45 წლის მომღერალმა თავდაპირველად ვიდეოს გამოქვეყნება გაასაჩივრა, თუმცა საბოლოოდ, სასამართლო შეთანხმების ფარგლებში, თანხმობა განაცხადა.
ტიმბერლეიკი 2024 წლის ივნისში სატრანსპორტო საშუალების ნასვამ მდგომარეობაში მართვის ეჭვის საფუძველზე დააკავეს. საბოლოოდ მან დანაშაული შედარებით მსუბუქი კვალიფიკაციით აღიარა, რის შედეგადაც 25 საათი საზოგადოებისთვის სასარგებლო შრომა მიესაჯა. პოპვარსკვლავმა ასევე ჩაწერა საჯარო განცხადება, სადაც საუბრობდა ნასვამ მდგომარეობაში მანქანის მართვის საფრთხეებზე. „ერთი ჭიქაც რომ გქონდეთ მიღებული, საჭესთან ნუ დასხდებით,” – მოუწოდებდა მომღერალი საზოგადოებას.
TMZ-ს მიერ გავრცელებულ კადრებში ჩანს, რომ პოპვარსკვლავი ვერ გადის სიფხიზლის ტესტებს მას შემდეგ, რაც პოლიციამ მისი BMW-ს მარკის ავტომობილი გზის პირას გააჩერა.
„ბიჭებო, მე უბრალოდ ჩემს მეგობრებს მივყვები ჩემს სახლში,” – ისმის ტიმბერლეიკის ნელი საუბარი. „არაფერს ვაკეთებ, უბრალოდ ჩემს მეგობრებს მივყვები სახლში.”
ამის შემდეგ ოფიცრები მომღერალს სთხოვენ, სწორ ხაზზე ცხრა ნაბიჯი გადადგას. „უკაცრავად, ცოტა ვნერვიულობ,” – ამბობს მუსიკოსი და იმაზე მეტ ნაბიჯს დგამს, ვიდრე დაავალეს. შემდეგი ტესტის დროს კი, როცა ცალ ფეხზე მდგომს ხმამაღლა უნდა დაეთვალა, ტიმბერლეიკი ამბობს: „ბოდიში, გული ძალიან სწრაფად მიცემს. ეს ძალიან რთული ტესტებია.” ამის შემდეგ მას ბორკილებს ადებენ და აკავებენ.
2 მარტს წარდგენილ იურიდიულ დოკუმენტებში მომღერლის ადვოკატები წერენ, რომ დაკავების ვიდეომასალა ტიმბერლეიკს „უკიდურესად მოწყვლად მდგომარეობაში” წარმოაჩენს და რომ ის „არავითარ ლეგიტიმურ საზოგადოებრივ ინტერესს არ ემსახურება.” ლონგ-აილენდის მოსამართლემ პოლიციას უბრძანა, არ გამოექვეყნებინა ვიდეოები, სანამ სასამართლო განხილვა არ დასრულდებოდა.
20 მარტს კი „ბილბორდთან” გაზიარებულ განცხადებაში სეგ ჰარბორის ადმინისტრაცია ამბობს: „მოხარული ვართ, რომ ეს საკითხი უკვე მოგვარებულია და სოფელს აქვს საშუალება, შეასრულოს კანონით განსაზღვრული ვალდებულება, გამოაქვეყნოს მასალა, რომელიც გასაჯაროებას ექვემდებარება.”
„საქმის დასაწყისში, მას შემდეგ, რაც ბატონი ტიმბერლეიკი დააკავეს, სოფელი ცდილობდა, შეესრულებინა ინფორმაციის თავისუფლების კანონის მოთხოვნები, როგორც ეს ხდება ნებისმიერ საქმეში, რომელიც მოიცავს ჩვენი პოლიციის ჩანაწერებსა თუ ვიდეომასალებს. ასეთი მასალა გადის განხილვასა და რედაქტირებას, რათა დაცული იყოს საზოგადოებისა და ოფიცრის უსაფრთხოება, ისევე, როგორც პირადი ცხოვრების კონფიდენციალურობა,” – ვკითხულობთ განცხადებაში.
