დიდი ბრიტანეთის შემდეგ კანიე უესტის კონცერტის აკრძალვას ახლა უკვე საფრანგეთიც განიხილავს.
საფრანგეთის შინაგან საქმეთა მინისტრთან დაახლოებულმა პირმა AFP-ს ინფორმაცია მიაწოდა, რომ პოლიტიკოსი უესტის 11 ივნისის მარსელის კონცერტის გაუქმებაზე აქტიურად მუშაობს.
წყარომ გაამხილა, რომ მინისტრს მტკიცედ აქვს გადაწყვეტილი და ყველა შესაძლო გზას იყენებს, რომ უესტის შოუ გაუქმდეს, ბოლო წლებში რეპერის მიერ გავრცელებული ანტისემიტური ნარატივის გამო. პოლიტიკოსმა უკვე დააინიცირა პროცესი, რათა რეპერს საფრანგეთში ჩასვლა აეკრძალოს. ამ საკითხზე ის მარსელის მერს, ბენუა პეიანსაც ესაუბრა.
მანამდე პეიანს უკვე გაჟღერებული ჰქონდა უესტის კონცერტის მიმართ უარყოფითი პოზიცია.
„უარს ვამბობ, მარსელი იქცეს პლატფორმად მათთვის, ვინც სიძულვილსა და უპატიებელ ნაციზმს ავრცელებს,” – დაწერა მან 4 მარტს. „კანიე უესტი არ არის სასურველი სტუმარი ველოდრომზე, რომელიც ჩვენი და ყველა მარსელელის ერთობლივი ტაძარია.”
ივლისში უესტი ლონდონის Wireless Fest-ზე იყო მიწვეული, სადაც ის სამი ღამის ჰედლაინერი უნდა ყოფილიყო. თუმცა ფესტივალი გაუქმდა მას შემდეგ, რაც დიდმა ბრიტანეთმა რეპერს ქვეყანაში შესვლის ნებართვა არ მისცა.
კანიეს ფესტივალზე მიწვევის გადაწყვეტილებას აკრიტიკებდნენ ებრაელთა ორგანიზაციები, ასევე დიდი ბრიტანეთის პრემიერ-მინისტრი კირ სტრამერი და ლონდონის მერი სადიქ ხანი.
ფესტივალის გაუქმების შემდეგ რეპერმა განცხადება გაავრცელა, სადაც ისაუბრა თავის მიზნებზე და აღნიშნა, რომ მზად იყო, შეხვედროდა ებრაელთა საზოგადოების ლიდერს დიდ ბრიტანეთში.
„ჩემი ერთადერთი მიზანია, ლონდონში ჩამოვიდე, ცვლილების შოუ წარვადგინო და ჩემი მუსიკით ერთიანობა, მშვიდობა და სიყვარული გავავრცელო,” – აღნიშნა უესტმა.. „მადლობელი ვიქნები, თუ ებრაელთა საზოგადოების წევრებთან პირადად შეხვედრისა და მოსმენის შესაძლებლობა მომეცემა. ვიცი, რომ სიტყვები არ არის საკმარისი. მე ცვლილება ჩემი ქმედებით უნდა დავამტკიცო. თუ ამისთვის მზად ხართ, მე აქ ვარ.”
ცოტა ხნის წინ რეპერმა ბოდიში მოუხადა ებრაელთა და შავკანიანთა თემებს საკუთარი ქმედებებისთვის და აღნიშნული საქციელი ტვინის დაზიანებით ახსნა.
რეპერი 28 მარტს ალბომით Bully დაბრუნდა, რომელსაც ლოს-ანჯელესში ორი შოუ მოჰყვა.
