30 ივლისს რუსთავის საერთაშორისო ავტოდრომზე მსმენელის წინაშე ლაივ პერფორმანსით Moby წარდგება. არტისტის კონცერტი საქართველოში Flitz Collective-ის ორგანიზებით იმართება.
2026 წელი Moby-სთვის ახალი შემოქმედებითი ტალღის დასაწყისია – არტისტმა იანვარში ალბომი Future Quiet გამოუშვა და მასშტაბურ ევროპულ ტურნეს გეგმავს. სწორედ ამ ტურნეს ფარგლებში ეწვევა ის საქართველოს.
თუმცა სანამ ქართველი მსმენელის წინაშე წარდგება, Moby-ს პერფორმანსს მსოფლიოს წამყვანი ფესტივალის სცენა დაეთმო. 10 აპრილს Coachella 2026 გაიხსნა. წლევანდელი ფესტივალი არა მხოლოდ მასშტაბებით, არამედ სიმბოლური მომენტებითაც იყო გამორჩეული, რომელთა შორის ერთ-ერთი Moby-ს პერფორმანსი აღმოჩნდა. ამერიკელმა არტისტმა პირველი შოუ 10 აპრილს, Mojave Tent-ის სცენაზე გამართა. მისი სეტი, რომელიც თითქმის ერთი საათის განმავლობაში გრძელდებოდა, უკვე შეფასდა, როგორც ფესტივალის ერთ-ერთი ყველაზე ემოციური და ნოსტალგიური მომენტი.
სცენაზე Moby-ს ვოკალისტი ჯეიკობ ლასკი (Jacob Lusk) შეუერთდა. მათ მიერ შესრულებულმა Natural Blues-ის ახალმა ვერსიამ Moby-ს მუსიკის მოყვარულ მსმენელზე დიდი შთაბეჭდილება მოახდინა. სეტის განმავლობაში არტისტმა კლასიკად ქცეული ისეთი ჰიტები გააჟღერა, როგორებიცაა: Porcelain, Go, Why Does My Heart Feel So Bad? და Thousand.
Moby-ს წლევანდელი გამოსვლა განსაკუთრებით სიმბოლური მისი და Coachella-ს კავშირის გამო იყო: არტისტისთვის ეს არის დაბრუნება იქ, სადაც თანამედროვე ფესტივალების ისტორია დაიწერა. Moby Coachella-ს ჰედლაინერი ჯერ კიდევ 1999 წელს იყო, როდესაც ფესტივალი პირველად ჩატარდა იმ სახით, როგორითაც დღეს ვიცნობთ. როცა 1999 წლის Coachella-ზე Moby გამოვიდა, მისი საკულტო ალბომი Play თვეების გამოცემული იყო. ეს ის ნამუშევარია, რომელმაც Moby მსოფლიო ვარსკვლავად აქცია, ამიტომაც მუსიკალური ინდუსტრია მისი შემოქმედებისადმი განსაკუთრებულ ყურადღებას იჩენდა.
1999 წლის Coachella-ს პროგრამაში Moby-ს გვერდით ისეთი შემსრულებლები იყვნენ, როგორებიცაა: Beck, Rage Against the Machine, Tool და The Chemical Brothers.
Coachella-მ დებიუტის წელსვე მოახდინა საფესტივალო ინდუსტრიაში რევოლუცია და ეს მნიშვნელოვნად უკავშირდება Moby-ს პერსონას. იმ პერიოდში ფესტივალები როკ-მუსიკასთან ასოცირდებოდა. Moby კი ერთ-ერთი პიონერი იყო თავის ჟანრში, ვინც დაამტკიცა, რომ ელექტრონული მუსიკის არტისტს ცოცხალი პერფორმანსით შეეძლო ისეთივე მუხტის შექმნა, როგორიც დიდ როკბენდებს.
განსაკუთრებული მუხტი Coachella-ზე Moby-ს წლევანდელ გამოსვლასაც ახლდა. მიუხედავად იმისა, რომ მუსიკალური ინდუსტრია ტრანსფორმირდა, Moby-მ შეძლო დაემტკიცებინა, რომ მას შეუძლია თავისი მუსიკალური ფესვებიც შეინარჩუნოს და ამავდროულად ახალი თაობის მსმენელისთვის თავისი ექსპერიმენტული მიდგომით მუდამ აქტუალურ არტისტად დარჩეს.
