BLACKPINK-ისა და სელენა გომესის 2020 წლის ერთობლივი სინგლის, Ice Cream-ის მუსიკალურმა ვიდეომ YouTube-ზე მილიარდ ნახვას გადააჭარბა. ეს K-pop ჯგუფისთვის რიგით მერვე, ხოლო სელენა გომესისთვის მეოთხე ნამუშევარია, რომელმაც ამ ნიშნულს მიაღწია.
რეტრო, ზღაპრულ სტილში გადაღებულ ფერად კლიპში BLACKPINK-ის წევრები LISA, JENNIE, JISOO, ROSÉ და სელენა გომესი მონაწილეობენ. ნათელი და მრავალფეროვანი კოსტიუმებით შემოსილი ხუთივე მომღერალი სხვადასხვა ადგილას ცეკვავს, მათ შორის ვარდისფერბუშტებიან სივრცეში და გასაბერ ატრაქციონზეც.
ვიდეოში ნაყინიც უხვად არის: სელენა გომესი ნაყინის ფურგონით ჩნდება, ერთ-ერთ სცენაში კი BLACKPINK-ის წევრები ნაყინით ხელში ცეკვავენ.
Ice Cream – BLACKPINK-ის სადებიუტო სტუდიური ალბომის, The Album-ის მეორე სინგლია. სიმღერა 8 კვირის განმავლობაში Billboard Hot 100-ის ჩარტში მე-13 ადგილზე პოზიციონირებდა, ხოლო Billboard Global 200-ში 14 კვირა დაჰყო და მე-8 ადგილი დაიმკვიდრა. თავად ალბომმა Billboard 200-ში მეორე ადგილი დაიკავა და ჩარტებში 26 კვირა გაატარა.
BLACKPINK 2016 წელს სადებიუტო სინგლის, Square One-ის გამოჩენის შემდეგ K-pop-ის ერთ-ერთ ყველაზე ცნობად სახედ იქცა. Billboard-ის Hot 100-ში გოგონების ჯგუფის 11 სიმღერა მოხვდა, მათმა მეორე სტუდიურმა ალბომმა Born Pink-მა კი წინამორბედის წარმატებასაც გადააჭარბა და Billboard 200-ის სათავეში მოექცა. აღსანიშნავია, რომ ჯგუფის ოთხივე წევრს წარმატებული სოლო კარიერაც აქვს და თითოეულ მათგანს Hot 100-ში მინიმუმ ერთი ჰიტი მაინც უფიქსირდება.
YouTube-ზე მილიარდ ნახვათა კლუბში მოხვედრით Ice Cream BLACKPINK-ის სხვა შვიდ სინგლს შეუერთდა, რომელთა შორისაა Pink Venom და Ddu-Du Ddu-Du. რაც შეეხება სელენა გომესს, მისთვის ეს ამ სტატუსის მქონე მეოთხე ვიდეოა ისეთ ჰიტებთან ერთად, როგორებიცაა: Come & Get It, Calm Down (Rema-სთან კოლაბორაციით) და ჩარლი პუთთან თანამშრომლობით შექმნილი სინგლი We Don’t Talk Anymore.
ნახეთ Ice Cream-ის მუსიკალური ვიდეო:
