30 აპრილს „ნიჭიერთა ათწლედი” ჯაზის საერთაშიროსო დღეს აღნიშნავს. ღონისძიებას „არტერია” უმასპინძლებს. ამ თარიღთან დაკავშირებით გაიმართება კონცერტი, რომელშიც სწორედ ათწლედის ჯაზის განყოფილების მოსწავლეები მიიღებენ მონაწილეობას. ანსამბლს ხელმძღვანელობს ცნობილი ჯაზპიანისტი, თბილისის სახელმწიფო კონსერვატორიის ასოცირებული პროფესორი, თბილისის ბიგ-ბენდის სოლისტი და „ნიჭიერთა ათწლედის” პედაგოგი დინი ვირსალაძე.
კონცერტზე ასევე დაუკრავს „ნიჭიერთა ათწლედის” საბავშვო ორკესტრი, რომელიც ჯორჯ გერშვინის, გლენ მილერისა და ლუი არმსტრონგის ჯაზსტანდარტებს შეასრულებს და მსმენელს ჯაზის ოქროს ხანაში ამოგაზურებს. ორკესტრის სამხატვრო ხელმძღვანელია ირინა ოდიშარია, დირიჟორი კი ათწლედის მე-12 კლასის მოსწავლე ანდრია ბოლქვაძე.
ღონისძიების სპეციალური სტუმრები იქნებიან: ჯაზპიანისტი პაპუნა შარიქაძე, ბასისტები ირაკლი დოლიძე და ლევან დეისაძე და დრამერი ზაზა ცერცვაძე.
„ნიჭიერთა ათწლედში” ჯაზის განყოფილება 2011 წელს ხელოვნებათმცოდნეობის დოქტორის, თამუნა მიქაძის ინიციატივით დაარსდა და ის საქართველოში ჯაზის ერთადერთი სპეციალური პროგრამაა. სწორედ 2011 წელს დააფუძნა იუნესკომ ჯაზის საერთაშორისო დღეც – 30 აპრილი. ათწლედის კურსდამთავრებულები წარმატებით განაგრძობენ სწავლას თბილისის სახელმწიფო კონსერვატორიაში ისევე, როგორც ევროპისა და ამერიკის პრესტიჟულ ჯაზაკადემიებში.
თამუნა მიქაძე:
„არტერიაში გამართული ჯაზის საერთაშორისო დღე იქნება ერთგვარი მანიფესტი – გლობალური მუსიკის აქტი, რომლის დროსაც მსოფლიო ერთიანდება და სხვადასხვა ქალაქში ერთდროულად ჟღერს ჯაზი, როგორც თავისუფლების, დემოკრატიისა და შემოქმედებითი თვითგამოხატვის უნივერსალური სიმბოლო. საქართველოც, როგორც ჯაზის მდიდარი ტრადიციების მქონე ქვეყანა, ამ მნიშვნელოვან მოძრაობას ღირსეულად უერთდება. ეს იქნება საღამო, სადაც შედგება თაობათა ცოცხალი დიალოგი. დამწყები და პროფესიონალი მუსიკოსები ერთ სცენაზე ერთ მუსიკალურ სივრცეს შექმნიან და შეუერთდებიან იმ ქალაქებს, სადაც 2011 წლიდან ტრადიციულად აღინიშნება ჯაზის საერთაშორისო დღე.”
ბილეთების შეძენა შესაძლებელია ბმულზე.
